Tau Tieden, as sik dei Lüd noch an dei 40 Fastendåch twüschen Aschermittwoch un Stillen Fridach hüllen, wiern dei Häuhner dörch dei Mauser un füngen wedder an, düchtig Eier tau leggen. Un as Jesus denn nå den Krüzgang an'n Stillen Fridach taun Wunner von dei vonne Doden uperstünn, hemm' sik wull dei Truerfrugens, nåmentlich Maria ut Magdala, Maria, dei Mudder von Jakobus un Josef un ok Salome, 'n olle Fründin von Jesus, as Freudenäten por Eier inne Pann schlågen, denn dat Ei gellt ja as dat Teiken för nieget Läben. ?hn Eier geef dat kein Läben up uns Ierd, un bald wier dat Enn' vonne Passchoonstiet åhn Eier undenkbor. Un so wier Paaschen (Ostern) all öltlings dat Eierfest, un allerlei Dierten as Voss orrer Adebor wiern dorför taustännig, Ostereier an'n Mann tau bringen.

"Unerhört! Dei Hås klaut sik den Applaus för uns' Arbeit!"

Ierst inne 30er Johren keem man bi uns in'n Nuurden up den Infall, den Håsen dei Såk mit dei kolorigen Eier tau œwerlåten, em dei Eierleggerie tautauschriewen. Un dei Hås mit sien Eierkiep wier up Postkorden tau finnen, dat geef Håsen ut Pappmasché, dei Engel ut't "Wihnachtsland Arzgebarch" kreegen Håsenbesäuk. Un dor dei Hås mit sien lange Uhrn nich son'n gaude Kaukenform afgeef, wür ut 'n Stutendeich dat bäten säute Osterlamm backt. Dat Lamm hett — anners as dei Hås — ein' religiösen Betooch: Dat stünn dorbi för Jesus sien schuldlos Opperdood.

Un so as dat tau Wihnachten Kringel ut Zuckerwor un Schokelor geef, geef't dat bald äbenso tau Ostern säute Eier un ok Küken, Speigeneier, Hasen. Männigein besinnt sik giern up dei lütten flüssig füllten Dragee-Eier von Bodeta-Säutworen ut Oschersläben, mit dei ok Ostertorten garniert würn. Un dor sünd noch dei säuten Kiebitzeier in Erinnerung, 'n bestimmte Oort Marzpan mit 'n Zuckerköst.

Kiebitz-Eier, Foto: Wikimedia commons, Rasbak

Dat gifft ok Lüd, dei denken, dat dei Kiebietz, dei nu würklich üm dei Påschentiet sien Eier lecht, dei bädere Osterhås wäst wier. Œwer man möt nich strieden; uns Feldhås, dei all öltlings vonne Jägerslüd wägen sien as 'n Licht lüchtend wittet Fell ünnern Stümmelstiert den Ökelnåmen Meister Lampe kreech, un ok dei Kiwitt, dei (liek as dei Kuckuck) sienen Nåmen sülben röppt, künnen sik mit dei niemoodsche Landwirtschaft in uns moderne Tiet nich anfründen un hemm' sik dull verkrümelt. Lampe finnt selten noch dat Flach, wo hei sik sien Sass, dei Ierdmull, buddeln kann, in wecker Håsen schlåpen. Un dei Kiwitt finnt dei natten Wischen nich mihr, dei sien Tauhus sünd. Ut dissen Grund wür dei Kiwitt all 1996 un nu wedder 2024 taun Johresvågel kürt, Meister Lampe keem 2001 un 2015 in dissen Genuss. Un doch möt uns dat tau denken gäben, denn sei ståhn hüt up'e Rode Liste: dei Kiwitt as "streng geschützte Oort" un Lampe as "gefährdet". Dorüm is dat Sammeln von Kiwitteier verbåden, dei Hås dörf noch twüschen den 1. Wienmånd (Oktober) un den 15. Hartung (Januar) jåcht warden. Dat is denn ok dei Tiet, wo Hasenbråden orrer Hasenpäper up 'n Disch kümmt.

"Ik kann ja doch nix måken un ok kein Eier leggen,
wenn ji mi nich ein bäten Ruum in'e Landschåp gäwen daut!"

Ok wenn Meister Lampe nich mihr so as einst œwern Acker hoppeln deit, so hoppelt hei doch ümmer noch tau Paaschen von Hus tau Hus un verdeilt Håseneier. Un dor den Håsen sien Fru Häsin heiten deit, hemm' dei Feministen dat mit dat Gennern bi'n Håsen/Häsin schwor. Dat mach ok Grund dorför sien, dat noch keinein versöcht hett, dei "Hasenschaul" von Albert Sixtus, dat Grimm'sche Husmärken von den Wettlop twüschen Hås un Schwienägel orrer dei wunnerbore Riemelgeschicht "Dei Hås in'n Dunass" von den Russen Sergei Michalkow gennergerecht orrer gor politisch korrekt ümtauschrieben. Un so heit dat mit Eberhard Esche ümmer noch: "Schwienägel harr taun Weigenfest ok den Håsen bi sien Gäst un schenkte in up't Allerbest..."

"Also Eier leggen do ik jedenfalls nich!"