vun Behrend Böckmann

Dat wier an'n 23. Tüffelmånd (Oktober) 1989, dat "Niege Forum" in Grünnung wull in Schwerin för 'n bäderen Sozialismus mit mihr Demokratie, Reise-, Medien- un Versammlungsfrieheit demonstriern. Doch dat hett den "Noch anne Macht hannelnen Politapparat" nich so recht tausecht, un man leet ut den ganzen Bezirk dei Genossen in Bussen nå Schwerin bringen, dei denn nåmeddachs Klock fief dei niege Bewägung up 'n Ollen Gorn anne Wand spälen süllen. Doch dat leep nich so as andacht, 40.000 Lüd schluten sik den Demo-Ümtoch mit Lichten von't "Niege Forum" an, un dei rankarrten Genossen un Kampfgruppenkrieger kreegen kolle Bein un wiern miteins blot stille Taukieker.

"Schaulen för dei sozialistisch Arbeit" von FDGB (dei DDR-Gewerkschaft), dat "Parteilihrjohr" för dei Genossen, dei "Rotlichtdåch" tau Beginn von jedet Studienjohr un dei välen Perfessers för Marxismis-Leninismus anne Universitäten, Hoch- un Fachschaulen (sei lihrten Geschichte der Arbeiterbewegung, dialektischen un historischen Materialismus, Wissenschaftlichen Kommunismus un Politische Ökonomie des Sozialismus) harrn Not, den Börger bitaubögen, dat dei Partei ümmer Recht hett, dei Sozialismus weltwied siegen ward, dei SU dei beste Fründ un dei Imperailismus dei gröttste Fiend is.

Dat geiht mi so dörch 'n Kopp, as 'n disser Dåch hürn un läsen kann, dat 'n nieger Akschonsbund "Weddersetten", Gewerkschaften, Gräune un olle Bekannte as dei "Omas gägen Rechts" un dei Aktivisten von "Fridays for future", linke Christen un anner rot-gräune Aktivisten an'n 4./5. Juli bet tau 50.000 Minschen mit Bussen nå Erfurt bringen wull, nich, üm gägen den AfD-Parteidach tau demonstrieren, sonnern mit dei Afsicht, den Parteidach vonne AfD up'e Messe Erfurt tau verhinnern. Dat, wat 'n 1989 in Schwerin mit den œwermächtigen Politapparat nich henkrägen hett, dat sull nu in Erfurt klappen? Un dat sull denn oewer demokratisch sien, einen Parteidach verhinnern? Hett ja ok nich klappt. Kannst von dei AfD hollen, wat du wullt, oewer mi is dat so leiwer.

Dat, wat sik einst in'n Osten as "Natschonale Front" utgeef, dat gifft sik hüt as dei Midd ut; un dei Imperialismus as gröttster Fiend von eins is nu dei radikale russenfründliche linke un rechte Rand, in den sik Populisten weigen. Un so as sik 1989 in Schwerin dei Lüd von "Paul Horch" ünner't demonstrierend Volk mischten, sallen 2026 in Erfurt dusende von Schutzlüüd dorför sorgen, dat sik Blockaden un Störakschonen nå dei Rägeln von uns Demokratie in Grenzen hollen.

In Schwerin künn man den DDR-Sozialismus nich redden, un dei Revolutschon mit Lichten nähm ehrn Lop. So as einst dat FDJ-Teiken up'e blåge Flagg in'n Wind flattern däd, so warden wull bald mihr un mihr blåge Flaggen mit dat AfD-Teiken gägen dei Rägenbågenflagg utschudert un hier un dor an Masten flattern. Dei Reformer vonne Midd strieden sik mihr, as dat's hanneln. Blot gägen dei AfD un gägen Putin taus sien eint dei Midd. Dei AfD kann sei jümmer noch vör sik herdriewen. Dei Rüstung säkert ein lierlütt Wassdom för dei Wirtschaft, man blot dei Rüstung. "Wi schaffen dat!" secht nu ok dei Reformenkanzler. Wat will hei denn schaffen? Woneem schall dat hengåhn? Dat secht nüms.