vun Behrend Böckmann

Boris röppt bi Elon* an,
ob hei em bäten helpen kann;
denn't löppt nich so, as hei dat wull,
hei kricht nich sien Kasernen vull.
Ok för ganz väl Geld verspråken
sünd junge Lüd för heile Knåken,
un låten so den Boris weiten,
sei låten sik nich giern dodscheiten.

"Dor Gefohr kümmt ut den Osten
sall't Verdeffendiern wat kosten!
Wi bugen all den Drohnenwall,
stüert dörch KI ut't All,
un daun uns ok dormit befåten,
dat Roboter-Soldåten,
åhn dat minschlich Blaut möt fleiten,
för uns' Frieheit warden scheiten."

Un so is sik uns Boris wiss,
dat Elon Musk dei Richt'ge is —
dei E-Autos in Düütschland buucht,
den ward ok dit nu anvertruucht:
Soldaten lopen nu von't Band,
un Bramborg is nu weltbekannt.
"O wat sünd dees Soldaten gaut,
in ehr Adern flütt kein Blaut,
un stüert warden's ut'e Fiern
mit KI, dat harrn wi giern!"

Ja, Elon is dei Bösewicht
as dei in Tolkien sien Geschicht**,
dei sik von Orks ein Riesenheer
buucht hett tau'n Kampf üm Middel-Eer.
Lord Elon schafft för uns solk Orks
mit Starlink un mit Techno-Works!

Boris fangt tau sinnieren an,
woans man Elon winnen kann,
denn Elon is dei rieke Mann,
dei mit Geld dull helpen kann.
Väl kümmt Boris in den Sinn...
un denn föllt em dit Glieknis in:
"Vör mihr as wull tweidusend Johr
måkte Qin*** sien Janken wohr,
keem as Kaiser von't Chinariek
uns Sinnen all so'n bäten gliek.
Hei leet ut Ton Soldaten brennen,
dei dörch Dod nich künnen ennen,
so sœbendusend anne Tåhl
as Uppasser an sien Graffmål."

Dat gifft in't Terracotta-Heer
en Barch Soldaten un ok Peer!

Ja, dei Terrakottakrieger,
sei wiern ümmer gaude Sieger,
nie nich keemen's in't Lazarett,
keinein brukte 'n Dodenbett.
Worüm süll man't nich beläben,
dat's as Roboter nie upläben,
un lopen bald von't sülwig Band,
von dat dei Tesla rullt in't Land?

Wat gaut wiern doch so'n E-Soldaten,
dei pariern as Automaten,
dei dörch KI hüt wieder keemen
un künnen Moskau so innähmen,
as einst Napoleon dat wull,
doch dei kreech dei Jack dor vull...
Mit E-Soldaten wür't uns glücken,
öwerall hen vörtaurücken.
Ja, dei wüürn wi denn ok nütten
un dei Ukraine stütten,
denn dor fehlt Kanonenfauder;
dood sünd Vadder, Söhn un Brauder,
un dei Rest geiht deserteern...
Laat uns' Roboters marscheern!
Baventau wier dat humaner,
un dat freit ok dei Ukraner!
Ja, dat mücht Schwatt-Rod hüt giern,
endlich süll sik dei Russ verfihrn
un dat grote Bäwern kriegen,
wenn uns E-Soldaten siegen.

So'n Ork hett miehrstens slechte Tähn
un is ansünsten ok nich schön!

Boris un Fiete hœgen sik,
schnacken all von't grote Glück,
daun furtsens sik an Elon wennen
un em ehr niege Infäll sennen.
Doch sien Freud is gor nich grot
un antert nu dei beiden blot:
"Solang Schwatt mit Rod regiert
un all dei Blågen malträtiert,
heff ik allerlei Bedenken
juch wat von mien Geld tau schenken!"

Kiek an, dei böse Saruman
denkt dor mal kommerziell-human!
Hett hei ein Hart för disse Welt
orr hangt hei blot an't leiwe Geld?

* Elon Musk
** "Lord of the Rings", also "De Herr vun'e Ringe"
*** Qin Shi Huang Di (259-210 v.J.C.), dei ierste Kaiser von'n chinesich Riek, leet för sien Graffanlåch 7.278 läbensgrote Tonsoldaten brennen, dei as Terrakotta-Armee berühmt würn.