vun Behrend Böckmann

As CDU-Kanzler Fiete Merz anfüng, dei Rent tau reformieren, dor nå em de Sozialstaat inne hütig Form nich miht up Duer finanziert warden kann – dor also hett sien SPD-Arbeitsministersch Bärbel Bas dissen Schnack as „Bullshit“ afdån. Wat soväl bedüden deit, as dat dei Kanzler wieder nix as Kauhschiet inne Brägenschöddel hett. Nu liggen dei 33 Vörschlääch vonne „Rentenkommis'schon“ för'n Rentenreform vör sei schnacken nu von'n Gesamtkunstwark, dat so tausåmenschaustert wür, dat denn, wenn dat allens güllig ward, dei Renten sogor  grötter un dei Bidrääch lütter warden. Dat Rentenniveu von 48 Purzent sall bet 2031 blieben un denn dei gesetzlich Rent dörch 'n Betriebsrent un private Öllersvörsorch upbädert warden.

Dei ole Generaschon målt sik jung. Wenn dat Bild doch Rentenbidrääg betahlen wüür!

Œwer för den Fall, dat man einen von dei 33 Vörschlääch ünnern Disch fallen lött, is dat Gesamtkunstwark in'n Dutt. Rosinenpicken is ünnersecht, secht Bärbel Bas un verspräkt dei jungen Bangbüxen, dat's dörch disse Reform nie nich lerrig utgåhn warden, sonnern noch mihr an Rent inne Kniep kriegen, as ehr Öllern dat harrn. Tau dit Gesamtkunstwark Rente tellt taun Bispill, dat dei gesetzlich Rent dörch Kapitalrent upbädert un dörch twei Purzent von 'n Bruttolohn ansport ward, dat dat Rentenöller anne Läbenserwartung angläken warden sall un dat denn mit 67 dei ierste Rent gifft, dei „Rente mit 63“ taun Utloopmodell ward, Sülfststännige sallen inne Rentenkass intåhlen (dei Beamten blieben buten vör), äbenso Minijobber bet up Schäuler, ok bi dei Rentanpassung sall dat weniger warden...

Natüürlich giwt dat keinen Mangel an Semp dortau:

• Dei DGB höllt nix vonne private Öllersvörsorch is ok dorgägen, dat dat mit dei Rent mit 63 ut sien sall, un verlangt sogor, dat dei Rent up 53 Purzent von'n Inkåmen kladdert.

• Franziska Giffey (Johrgang 1978), Wirtschaftsenatorin in Berlin, secht, wecker 45 Johr klächt hett, süll ok wiederhen sien Rent mit 63 kriegen.

• Manuela Schwesig (Johrhang 1974), Landsmudder von Mäkelnborg, hett grote Bedenken, dat doch nich allens, wat Merz will, „1:1 verwürklicht warden“ kann.

• Peter Bofinger (Johrhang 1954), VWL-Perfesser anne Uni Würzborg un Maat inne Rentenkommischon, wohrschucht, dat, wenn Beamte mit inne Rentenkass intåhlen sallen, dei Gemeindekämmerer dubbelt deip inne Kass griepen möten.

• Pascal Reddig (CDU), CDU-Maat inne Rentenkommischon, will dei Rent mit 63 in'n Tiet so kort as mœglich up Ies leggen.

• Marcel Fratzscher (Johrgang 1971) is Poletikberader un Ökonomieperfesser anne Humboldt-Uni tau Berlin, hei föddert all lang 'n Rentenreform, süht œwer inne Vörschlääch, dat Frugens un junge Lüd tau kort kåmen.

• Christian Lindner (Johrgang 1979) as schasster Finanzminister inne Ampelregierung hett Bedenken, dat dei Rentenbidrääch dörch 'n Kapitalrent noch höger warden. Ut wirtschaftlicher un ok finanzpolitischer Sicht hett hei Bedenken un fråcht sik: „Wat hett Friedrich Merz vörmåls in sienen Beruf måkt?“

• Un ok Preister Gauck mellt sik tau Wurt. Wull hei uns einst wiesmåken, dat 'n Pullover helpen kann, wenn dei Russ denn Ölhåhn taudreiht, so vertellt hei nu, dat jede würklich Reform dat Volk allerhand taumauden deit un dei Poletikers dat nu vernünftig verkloren möten.

Dat Kunstwark Rentenreform ward dat liekers väle, väle Rentner nich mœglich måken, sik 'n Intrittskort taun Dresdner Opernball twüschen 300 € un mihr as dusend € tau leisten, för 130,00 € mit twei Enkelkinner den Tierpark Hagenbeck tau besäuken orrer bi Lux Curry up Sylt 16,80 € för 'n Port'schon Currywust mit Tüffelsticken uttaugäben.

"Wat schall dat kosten?! Is nich drin!"

Dörch't Gesamtkunstwark „Rente“ sall't bi 'n Geburtenrat von 1,35 Kinner je Fru mœglich warden, dat junge Minschen von hüt, dei sülben ümmer weniger Kinner inne Welt setten un doch för dei Rent von dei ümmer öller wardenden Ollen upkåmen möten, as taukünftige Rentner sorgenfrie läben kœnen.

Na denn: Achtung, fertig, Abrakadabra!