vun Behrend Böckmann

In'n Momang kreisen twei Ruumstatschonen in'n Häben: dei ISS, dei dei Russen un Amerikaner tausåmen ünnerhollen, un Astronauten orrer Kosmonauten vonne Weltrumbahnhöff Baikonur inne Kasachisch Stepp (dat Rebeit hett Russland bet 2050 pacht't), orrer dei drei amerikan'schen Weltrumbahnhööf, as dat sünd dat Kennedy Space Center un dei Cape Canaveral Space Force Station up'e Insel Merritt Island as Deil von Florida un dei Vandenberg Space Force Base in Kalifornien in't All reisen. Un Europa hett 'n eigen Bahnhoff för All-Utfohrten in Kourou /Südamerika, wo 23 europä'sche Länner as "Europäisch Weltrumstatschon" in'n Œwerseerebeit von Frankriek Ariane-Raketen taun Häben schicken, dei dat Sonnensystem erkunnen un dat Weltklima in'n Ogenschien nähmen sallen. Näben dei ISS gifft dat siet 2021 noch 'n tweite Rumstatschon, dei chinesisch Statschon Tiangong, dei von ehrn Weltrumbahnhoff Jiuquan inne Wüste Gobi dei chines'schen Taikonauten tau ehr Statschon bringen.

Dei ISS

Wiederhen plant dei amerikan'sche NASA 'n internatschonale Rumstatschon "Lunar Gateway", dei den Månd ümkreisen un as Sprungbrett för Marsreisen deinen sall.
Un dor denkt denn Kanzler Fiete Merz, so kann dat nich wiedergåhn, so'n bäten Kourou in Südamerika is tau wenig, wenn hei Europa taun Weltmacht måken will. Un dei ISS is bald an'n Enn un ward as 'n Ruine in't All rümmerfleigen, dei Amerikaner ünner Trump låten sik von Merz nich inne Korden kieken, un dei Chinees måkt sien Ding för sik; un in Kourou willen 23 Länner von Paris ut mitschnacken, wo dei Thron von Macron ok wakelt un dei Fründschaft mit Düütschland in'n Momang mihr Bündnisplicht as wohre Fründschaft is. Niege Verbinnungen möten her. Un dor hett 'n sik Norwägen utkäken.

Norwägen kann sik ja ok seihn låten!

Norgwägen "prosperiert", is 'n riekes Land, buucht mit Düütschland "Submarins", hett Ierdöl tau vergäben un hett ok 'n lütten Weltrumbahnhoff, 'n Spaceport, up'e teihntgröttst norwägisch Insel Andoya, rund 300 km nüürdlich von'n Polarkreis in't arktisch Nuurdmeer, wo up 489 km² so anne 4600 Inwåhners von Tourismus mit Walsafaris orrer "Whale watching", Polarlichter un dei Middernachtssünn, den Fischfang un den Andoya Spaceport (Andøya Rakettskytefelt) läben. Von dissen Spaceport güng 1962 taun iersten Mål dei Raket Ferdinand 1 gaut 101,5 km inne Hööchde — un siet disse Tiet sünd mihr as 700 Raketen un Ballons mit Forschungsafsichten inne Luft gåhn.

Ja, Norwegen möt 'n sik angeln, üm sik as europäisch Weltmacht œwer dat rund 1,1 Millionen km² grote Nuurdmeer twüschen Norwägen, Island un Spitzbargen den Taugang tau dat Nuurdpolarmeer mit dei Iesboren un Polarvöss up't Ies tau säkern — un von Andoya ut womœglich mit Raketen russ'sche un chines'sche "Submarins" von ehr Unwäsen aftauhollen. Un Norwägen is ja ok noch säkerer as dei dän'sche Insel Grönland, up dei Trump 'n Ooch schmäten hett. Un up disse norwägisch Nuurdmeerinsel Andoya is dat so as tau Hus. Dat gifft Stråten, mit Schäp un Fleiger kann man dorhen kåmen, ok lött sik dat läben as Gott in Frankriek,wenn man nauch inne Kniep hett un nich scharp up "Peer Gynt" von Henrik Ibsen in't Theoter is. Un disse Dåch wier't wedder so wiet: Dat bavarisch Start-up-Ünnernähmen "Isar Aerospace", dat as Spitzenleistung von düütsche Ingenjörkunst dei düütsche Orbitalraket "Spectrum" buucht, will nu taun tweiten Mål dei ierste würklich düütsche Orbitalraket "Spectrum" fleigen låten. Un dor sik dei Kanzler, sien Kriegsminister un 'n grot Angturåsch — mit dorbi dei norwäg'sche Ministerpräsident Støre un dei kanad'sch Premierminister Carney — in Bardufoss/Nuurdnorwägen uphöllt, üm sik sülben 'n Bild von dei NATO-Übung "Cold Response" tau måken, mit 25.000 Soldat:innen ut 14 Länner, dorünner ok 1.200 Düütsche, dei as europäisch Kraft den Iernstfall inne Arktis ünner Küll präuwen.

Wåterfäll sünd schöner as Raketen!

Un wenn man so wiet in Nuurden is, denn süht dat Protokoll ok noch 'n lütten Afstäcker von gaut 200 km up dei Insel Adoya mit den Weltrumbahnhoff vör, dorhen, wo dat düütsche Wunner "Spectrum" inne Luft gåhn sall, dat düütsche Wunner, dat mihr as blot Wäder- un anner Satelliten tau Petrus bringen sall.