vun Behrend Böckmann

2024: Pietsch Fuss

Pantohn (Pantone) ut Amerika
is inne Farwenwelt bekannt.
Von dor ut gifft man Målers an,
woans man Farwen mischen kann,
un låten ok dei Målers weiten,
woans dei schönen Farwen heiten.

Dei Målers sünd twoors gaud in Kunst,
doch hemm s' von Farwen keinen Dunst.
Man Målerie geiht ja nich ohne —
dorwägen fragen s' denn Pantone!

Ok hett sik dei Modewelt
up Pantohn-Nåmen fix instellt:
Un so wier in't verläden Johr
dei „Peach Fuzz“-Farf ganz wunnerbor,
un männigein, dei glöwt dat kum,
von'n Plüschappel* dei sammet Flum
sall jeden dat Gefäuhl nu gäben,
dat leif un fründlich is dat Läben,
wenn't Schnufdauk, Blus un dei Tapet,
'n Ünnerbüx un't Mixgerät,
wenn't Snicker un den Lippenstift
in dei „Peach Fuzz“-Farf nu gifft!
Sülfst „Peach Fuzz“ ward taun Farwendrom
för'n Trendschmuck in den Dannenbom!

* Pfirsich

2025: Mokkamuus

Pantohn hett wedder œwerlecht
un mixt 'n niege Farf taurecht:
Dei Modefarf för't kåmend Johr
licht twüschen Beesch (beige) un Schokelor,
un låten alle Welt nu weiten,
dat's „Mokka Muus“ (Mocha Mousse) deit heiten,
dat allens, wat in Brun is töönt,
den Minschen bannig dull verwöhnt,
geiht warm doch ut von jedet Brun
un Harmonie von jeden Schum.

"Bün ik meint? Ik bün ok mokkabrun!"

Schum sünd modisch brune Rüschen
an beesch-brun Kamelhorpüschen.
Brun in alle brunen Tön
is fiefuntwinnig wunnerschön,
hett mit Gesinnung nix an'n Haut,
doch Mokka Muus is bannig gaut,
un ümmer as taun Johresend
gifft't 'n Dannenbom in Trend —
sülfst dat Lametta is in brun,
sotauseggen dei fiene Schum.

2026: Klaut Dänzer

Pantohn verkünnt för't neechste Johr
as Modefarf nu Witt, ganz klor —
un lött alle Welt denn weiten,
dat's „Klaut Dänzer“ (Cloud Dancer) ward nu heiten.
As Wulkendänzer warm un fien
sall dat Witt dei Leifstäl sien,
un so as witte Wulken schwäben,
sall't ok dat Witt up Ierden gäben.
Witt as dei witte Frädensduf
lücht witt dei Minsch, dei gaude Stuf.
Doch wecker måkt den Wessel mit:
hüt noch brun un morgen witt?

"För mi is't kein Problem, ik mål
in klores Witt den bruunsten Saal!"

Kann sik 'n Minsch so fix besinnen
un wedder tau sik sülben finnen,
sülfst wenn hei sik up Witt instellt
in uns doch so klörig Welt?
Blot eins is as dat Amen wiss,
dat dat bald wedder Wihnacht is.
Dei witte Trendschmuck lücht in Drom
all an den groten Dannenbom!

Sogor dat Wäder späält nu mit:
Dat sniet in Modefarw — in Witt!
Uns Dank för disse Attraktschon,
dei witte Wiehnacht, gellt Pantohn!