Den Fischsemmeldag fieern

vun Behrend Böckmann

Dei Welt vonne Wöddel her ännern, ut Christen Muselmanen, ut Kommunisten Natschonalisten, ut Minsch un Schwien Veganer måken un den Maddik för'n Minschen hollen — denn dei hei fäuhlt äbenso as'n Minsch, un wenn hei up'n Angelhåken treckt ward, denn is dat för em nich anners, as wenn 'n Minsch bi'n Unfall ünner't Auto tau Dod kümmt. So sinnieren Minschen, dei gägen dat Hollen von Dierten taun Nutzen von 'n Minschen sünd un verlangen, dat dei Minsch sik rein vegetarisch ernähren un nicks tau sik nähmen sall, wat von'n Diert kümmt: kein Melk un kein Bodder, kein Ei un kein Fleisch. Nich mål Immenhonnig dörpen's sik up't Brot schmeern... Hawermelk, Lupineneierrühr, Tofu orrer Bohnenwittkees ut Sojabohnen sünd dei niegen Delikatessen.

"Tofu?! Beute as Mitminsch behanneln?! Ik glööv, ji tickt nich mehr richtig?"

Dei Mudder von disse Infäll is Ingrid Newkirk (Johrgang 1949); 1980 grünnt sei dei internatschonale Diertenschutzorganisatschon "PETA". Disse "Aktivisten" fäuhlen mit malträtierte Dierten, sünd gägen Grotanlågen för Dierten un gägen medizinsche Versäuke mit Dierten in Labors. Dat sall't nich mihr gäben, denn twüschen Minsch un Diert gifft dat keinen Ünnerschied, Minschen hemm' nå dei Grünnerin kein anner Rechten as dei Dierten, för sei is "ein Rott so as'n Schwien un 'n Hund so as' Jung — sei all sünd Dierten!"

Dei Adepten von disse Philosophie måken nu all Minschen wies, dat 'n sik blot von Planten ernähren sall, hemm' œwer kein Ratschlääch pråt, wat tau måken is, dat dei Katt dat Musen lött, dei Wulf kein Schåp mihr ritt un dei Hääkt nich nå lütte Plieten schnappt... Un all, dei nu von Planten läben willen un den Appel nich äten kœnen, in den 'n Wörm sien Tauhus hett — all dei näumen sik Veganer*innen, gäben sik mit dei Gennergesellschaft dei Hand un böömen sik so dubbelt gägen all dat up, wat dei miersten Minschen in uns Gesellschaft för normål un nödig hollen.

För normål höllt dei normåle Nuurddüütsche, dat dat 'n leckern Fischsemmel anne Happenbaud an'n Håben, bi't Fischerfest orrer up'n Johrmarkt gifft — denn Fischsemmel belecht mit Matjes, Bismarckhiring, Rollmops, rökelt Lass, Spickaal un gräune Garnitur. Dei Fischer von't holstein'sche Ostseeäuwer hemm' sogor den Weltfischsemmeldach erfunnen un fieern em siet 2011 ümmer an'n iersten Sünnabend in'n Maimånd. Un up Rügen ward dat ok versöcht. Un dei Fischsemmelfrünn' hollen dat nich mit dei PETA-Aktivisten, dei von uns verlangen, mit den Fisch so as 'n Minsch tau fäuhlen, em nich mihr dod måken un denn in'n Semmel inklemmt lustvoll rünnerwörgen.

Hmmm... rinbieten!

So wier, is un blifft dei Fischsemmel dei "Burger in'n Nuurden", un em tau Ihren ward dit kulinar'sche Kulturgaut nå un nå an'n iersten Sünnabend in'n Maimånd as Fischsemmeldach in Happenbauden, Wirtschaften un Fischerhöff anne Küst fieert. Gistern wier dat wedder so wied. Ik heff mien Fischsemmel genåten. Un dat Besonnere is, dat dei Fischsemmeldach mål nich in Amerika sien Wöddeln hett, sonnern 'n Infall vonne "Kooperation des Ostsee-Holstein-Tourismus e.V." is.

"Unerhört! Welkeen behannelt uns as Mitminschen?!"

Un nu kümmt't: Tau dei Reklåme gehürt ok, för vegåne Fischsemmeln tau trummeln! Dei Hiring ward ersett't dörch Blaumenkohl, dei mit Algengewürz den Fischgeschmack annimmt, un upfidummt mit 'n veganen Honnig-Semp-Stipp un Agavensirup, iehrdat dei vegane Fisch-Semmel den Besidder wesselt. Un dit Produkt, von dat wi normålen Minschen seggen würn, "dat is nich Fisch un nich Fleisch" — un nau dat is ein vegetarische Fischsemmel ja nich —, dit Produkt also köpen sik denn mit Triumph dei korrekt gennerten vegånen PETA-Aktivist*innen!

Œwer nich mit mi: Wenn sei schon ehre vegane Semmel kriegen, dat Gennern kriegen sei von mi nich! So kann ik sei tauminnst noch ein bäten argern.