|
vun Behrend Böckmann Nu harr mi dat erwischt, dei Luft wür knapp un af in't Sükenhus. Un wenn man so inne Puuch licht un gråd nich as dei Häwelmann taun Ünnersäukung kutschiert ward, denn geiht einen so allerlei dörch 'n Kopp. Un up eins bün ik bi China lannt un will von den einen un annern weiten, wenn's dorbi sünd, mi wedder up'e Bein tau helpen, ob dat Krankenhus åhn China œwerhaupt arbeiden künn. Un dei Anturt heit ümmer: „Ik glöw nich.“ So as dei billigen un unkaputtboren Dannenbomkugeln uns Dannenböm un anner Dekoworen uns Stuwen schmücken — von Ackerschnacker, Kiekschapps, Räkner un Roboter willen wi gor nich ierst schnacken —, is ok so allerlei an Verbänn, Tupfer, Kompressen, Einwechsprütten, œwer ok technische Såken un allerlei annern Kråm ut China in so'n Sükenhus nich wechtaudenken. Von dei Wirkstoffen un Medikamente willn wi sowiso stillswiegen.
Herrjeminäh, wat hett sik China, dat „Reich der Mitte“, doch mausert! Dat is gaut 50 Johr her, dat Mao den Noors tauknäpen hett, un an'n 6. Wienmånd (Oktober) 1976 wür dei „Viererbann“ dei Gorut måkt; dei niege Führung räkent mit dei Kulturrevoluschon af un leet China nu as Phönix ut'e Asch wedder upstiegen. In 50 Johr hett dit Land dat henkrägen, sülwst dei USA tau œwerhålen, un is hüt dei gröttst Volkswirtschaft inne Welt. Ok in Amerika un Europa söcht dei niege Siedenstråt ehrsglieken, China is ganz wiet vörn, in't All, bi'n Roboterbu, gräune Energie usw. Ehr Volk hemm sei 100% ünner Kuntrull, ok dank digitale Rundüm-Œwerwachung. Oppositschon, Kritik an dei Regieren — Pustekauken. Un China måkt ok nå buten Poletik, nich tauletzt as 'n mœglicher Vermittler in'n Ukrainekrieg. China is upstägen taun „Supermacht“, taun „Wirtschafts- un Werltmacht“ von't 21. Johrhunnert. Un dat lött taun Bispill Kanzler Merz un sien Frünn as Macron, Selenskyj un anner schweiten. Åhn China löppt nix mihr, œwer Merz, dei sik sülben taun Föhrer von Europa måkt, hett grote Bang, dat sik disse Weltmacht taun utwussen Dråken mausert. Woans mit düütsche Diplomatie un Afsichten för 'n gaude Tausåmenarbeid mit China den Chinesen bikåmen, üm nich mihr so dull von China aftauhangen? Woans künn dei Hannel mit China för beid Länner von Nutzen sien? Wat möt dei düütsche Wirtschaft daun, üm den Wettlop mit China tau beståhn?
Œwer woans den Chinesen bipulen, dat hei so as Düütschland dat Öl von'n Russen
Ün denn kümmt dei Schwester, dei hüt ja Pläächfachkraft heiten deit, dei mi an'n Tropf lecht — un mien Sinnieren ward wedder wohr, åhn China wier dat so nich mœglich.
China-Fotos: Hans-Jürgen Grebin
18.11.2026 |