vun Meike Balzer-Fraun

In uns Blatt — in de Bremer Nachrichten vun'n 2./3. Mai 2026 — stellt sik en Start-up ut Bremen vör. Se maakt un verköfft allens, wat se meent, wat een för sien Baby so bruken deit. "Vun Öllern för Öllern!"
Kannst allens waschen un is allerbest Qualität för de fienföhlige Babyhuut un de Kinnerstuuv. Süht smuck ut — kumplett naturfarven —, un wenn een sik dat leisten kann: man to!
So wiet, so goot.

"Mien Beden to Disch is: Leve Gott, maak, dat de Placken
nipp un nau op dat düre Tüüchs vun den Start-up gaht!"

Man wenn ik denn lees, wat noch so in de Reklaam steiht, denn blifft mi reinweg de Luft weg!

"Die … Palette von Naturtönen, wie man sie auch in vielen zeitgenössischen Wohnmagazinen … sieht. … Der Grundgedanke war, das Babyzimmer nicht als optischen Fremdkörper einzurichten, … es soll sich harmonisch ins moderne Ambiente einfügen."

Kunnen seggt dorto: "Diese Produkte stellt man sich gerne in die Wohnung." "Endlich Sachen, die nicht so babymäßig aussehen!"

Dien Kind schall sik also in en ‚Ambiente' infögen, wat jüst anseggt is? — Wenn du man anners keen Sorgen üm dien nie'en lütten Mitwahner hest!

"Ökologisch stilvoll, dat is mien Motto! Wenn ik dat Ambiente verbeter,
denn bloots mit Natuurfarven! Un bio! Bio-Bickbeern nehm ik opleevst!"

Tööv man op de eersten Brabbelversöök mit'n Snuut vull Wuddel- oder Spinatbrie, de Handafdrück op dien Designersofa na en Vullkoornkeks mit Mannelmuus (Nutellatoast gifft't ja woll nich). De drögen Sandbulten, de na en Besöök oppen Speelplatz ut de naturfarven Büxentaschen rutscht, kannst ja noch fein wegsugen.
Man wat du allens opwischen muttst, wat sabbert un utspuckt warrt, wat rünner drüppelt, överlöppt, ümfallt un tweigeiht, wenn dat eerst losgeiht mit: "KANN IK ALLEEN!" Un worup un womit so'n lütt Schieterbüx allens malen kann, dat glöövst du nich.
Ok an rosa Glitter un kakelbunt Bob-der-Baumeister-Shirts kümmst du woll jichtenswenn nich an vörbi.

Wat'n arme Kinnertiet, wenn dat ‚Ambiente' nich op dat Bisien vun Kinner henwiest!

"Mit Bio heff ik dat nich so, mien Ambiente
gestalt ik opleevst mit Schockelor!"

Ut Second-, Third- un Fourthhand-Kledaasch sünd all de Schaadstoffen un veel vun de Farven middewiel rutwuschen, wenn ok männicheen Placken ‚waschecht' is. Man sülven de deit de Babyhuut keen Schaden nich.

Nadregen wo Öllere rutwussen sünd und Opdregen vun de Saken, de al so'n beten Afdragen sünd, dat weer eens begäng, denn ooltmoodsch — un is nu so ökoloogsch sinnig, as dat man geiht!

Un wenn du denkst, dat de Lütten ut dat Gröffst rut sünd, denn muttst noch de Teenager-Partys dörchstahn. Kannst bi't ‚Ambiente' nu al mal an't Öllerwarrn denken — mag aver ok ween, dat du dat ‚Ambiente', wat dien wussen Kinner torüchlaat, gor nich mehr missen magst.

Is doch to un to schöön to Huus!

"As Profi holl ik mi nich an Tohuus,
ik verbeter dat Ambiente enerworrns!"