 |
|
Düütschkland spring in den Weltruum van Ludgerd Lüske De Biller köönt Se per Klick vergröttern.
Taurügge kaomt Se denn mit den Zurück-Knoop van den Browser.
Dei Spectrum-Rakete is ein Dräger-Rakete för Lasten so at Satelliten. Sei woor van dat bayrisch Ünnernehmen Isar Aerospace buut un kunn woll dei Ruumfort in Europa nei upstellen. Dei Spectrum-Rakete steeg an'n Aobend bi'n Uhr off Teihn (MEZ) van'n Weltruum-Baohnhoff Andøya in Norwegen up. (In Düütschkland gifft kein passliche Stäe för sowat.) Bold teihn Minuten läöter güng dei Funk-Verbinnung flüschk; dei Weg nao dei Boddenstation was tau lang. Aower Aerospace geef bekannt, dat dei Rakete ehre Laodung in'n Weltruum pass affsetten kunn. So is eiersmaols eine privaot plaonte un bawde Rakete van Europa ut bit in den Erd-Ümloop flaogen.
Eine Last-Rakete kummp van Europa ut in den Erd-Ümloop Dei Ümloop is kiene faste Stäe, sünners ein staodiget Fallen üm dei Ern ümmetau. Wenn dei Rakete dor blieben schall, mutt sei nich blots in eine grote Hööchte upstiegen, sei mutt uck sünners up eine hoge Geschwinnigkeit kaomen. Ehre Ümloop-Baohn böget sick dorbi pass äöwer den Erd-Bodden. Dei Rakete mit ehre beiden Torns is 28 m hoch. Teihn Driew-Warke driewet dei Rakete eiers dör dei dichte Atmosphäre; nao dat Affspringen van den eiersten Torn äöwernimmp dei bäöwerste Torn dat Hochdriewen un bring dei Last up dei vörseihn Fleig-Baohn. Disse Rakete is för lüttke un middelschwore Satelliten bawet un kann bit tau 1000 Kilogramm in den erdnaohen Ümloop drägen. Sücke Satelliten kieket nao dat Weer un dei Ümwelt. Sei äöwerdräget Verbinnungs-Daoten off helpet bi dei Forschkung. Isar Aerospace plaont dat Herstellen van mehr at 30 Raketen in ein Johr. Man nimmp sick väl vör, wiel man bi staodige Starts eine gaut loopen Technik, inspälte Afflöpe un ein staodiget Naokaomen van Materiaol bruket.
Dör Utprobeiern un Lern kummp man hoch herut Rumfohrt-Entwicklung löpp meist nich liekut. Bi den eiersten Testflug in'n März 2025 steeg dei Rakete woll up, aower sei füllt nao bold 30 Sekunnen, at plaont, in't Waoter. Den tweiden Start möß man uck fäökener verschuuwen. Technischke Nücke, leipet Weer un wohrschienlick ein Leck in einen Druck-Kädel hüllen dat Wark up. Aower so ein Daolschlag bring in dei Ruumfohrt wichtige Daoten an'n Dag. Dormit käönt dei Technikers ehre Modelle testen un Bau-Deile verbätern. Jüst bi Raketen warket weuste Kräfte taugliek: starket Schüddeln, hoge Temperaturen, wesseln Luftdruck un dei Last dör dat Dröckerwern. Ein gaut loopen Flug bewieset nich blots, dat einkelne Driew-Warke funktioneiert. Dei wieset uck, dat mehr at duusend Deile in ein grotet Spill tausaome warket: dat sünd Tanks un Ventile, Navigation un Funk-Verbinnung.
Europa bruuket sülwes Raketen
Den Markt för Satelliten-Starts häbbet Ünnernähmen ut dei USA ünner sick updeilt, besünners Elon Musk sien Firma SpaceX mit dei deils wedderbruukte Falcon-9-Rakete. Europa bruuket dorüm bi väle Missionen Start-Stäen butsiet van usen Erddeil. Mit eigene Last-Raketen bruukde man nich so lange teuwen. Et geef so mehr Wettstriet bi Wätenschup un Wirtschkup un unaffhängige staotlicke Missionen. Disse wichtige Laoge verklort dei politische Hülpe. Isar Aerospace werd föddert van dei Europäischke Weltruum-Organisation ESA. Bayern will bit 2030 eine Milliarde Euro för dei Ruumfohrt utgäben. Uck dei Bund plaont hoge Utgaoben för Weltruum-Sekerheit un militärischke Ruumfohrt-Projekte. Satelliten hört all lange tau dei empfindlicke Grund-Utrüstung: Navigation, Kommunikation, Weer-Deinste und Erd-Erkundung hangt dorvan aff. Ein Meister-Wark is schaffet, aower noch nich dei Alldaogs-Bedriew Mit den best loopen Testflug is man technischk un bildhaft einen heilen End wieder kaomen. Aower dei Weg is noch lang, bit man einen staodig loopen Start-Deinst wirtschaftlick an'n Gang bring. Dei tauken Missionen mäötet wiesen, off man Spectrum fäökener un wisse bedriewen kann, un dormit Satelliten nau utsetten un wirtschaftlick ünnerhollen kann. An Ümwelt-Fraogen so at Schaodstoff-Affgaobe, Larm un Weltruum-Schrott mutt man uck denken. Utsicht Spektrum staiht för eine neie Technik in Europa: lüttke, privaot bawde Raketen schullen den eigen Weg in den Weltruum möglick maoken. Off dat nu eine neie Tied giff, hang nich aff van einen einkelnen Start, sünners van dei Unkosten un den staodig sekeren Bedriew. Dei Testflug wieset aower, dat Dütschkland un Europa technischket Wäten häbbet, womit man in den internationaolen Weltruum-Markt eine gröttere Rulle spälen kann.
Intressante Links: Video: vimeo.com-Isar
Aerospace Südollnborger Platt: Ludgerd Lüske |
||
|
3.10.2026 |
