vun Meike Balzer-Fraun

Mien Omas hefft in't Fröhjohr in dat hele Ackerland Kohschiet ünnergraavt un allens in een glatt harkt. Denn woor dat Saatband spannt un lütte Weeg, twee Fööt breed, dor rin peddt.

So geev dat jeedeen Johr nie'e Grööntüüchbeden. De Weeg woorn harkt un mussen jümmers ‚swatt' sien! So harr ik dat lehrt!

Nu weer ik Schoolmeestersche, Fröhjohr weer Klassenfohrten- un Tüügnistiet. Veel Tiet för den Goorn bleev dor nich, un dat Graven güng mi bannig in'n Rüch. Wat doon? Över Sauzahn un Tiefkulturbeete harr ik veel intressante Saken leest. — De Versöök hett sik würklich lohnt!

Heff eenmal in den suern Appel beten, 'n Barg 25 mal 50 cm Zementplatten köfft (de kunn ik alleen muddeln), en letzt Mal ümgraavt, dat Land in Beden opdeelt un smalle Plattenweeg dortwüschen leggt.

Sietdem kann ik een Beet na dat annere mit den Sauzahn dweer un dwars dörchtrecken un mit de grote Holthark glatt harken. De Fruchtwessel is keen Problem nich, un sogor bi de Oorn mutt ik nich op de Beden pedden.

Ok de Kompostwöhleree is lichter worrn: Gliek wenn de Kantüffeln handbreet ut de Eer kiekt, kriggt dat Beet en dicke Schicht vun den twee Johr olen Kompost. Groff weg, nich dörch't Seef. Dat anner Johr is dat denn allerbest för Bohnen.

Glieks na de Oorn sei ik Phacelia as Grööndünger. Na en warmen Winter mutt ik in't Fröhjohr 'n beten ‚Unkruut' tucken, "finn" aver ok jümmers veel Twee- un Mehrjohrsplanten op de Beden, de ik ümplanten oder weggeven kann.

De Goorn seggt: Goden Aptiet!