vun Meike Balzer-Fraun

Juli 2025. Is jüst nich veel to doon dor buten.

Sitt avends nu faken mit en Pott Melissentee op de Bank, bewunner dat Opblöhen vun de Nachtkarsen un snüffel ehren Röök. Sitt dor un sinneer, wo dat anfungen hett, un wo dat woll hengeiht mit mien Goornerleven. Egentlich ja ‚Goornerschenleven', man dat klingt dösig, oder? Also "Leven in'n Goorn"!
Bün jümmers froh, wenn ik mal wedder wat schafft heff, un frag mi, wo lang wi dat hier woll allens noch oppe Reeg kriegen doot.
Wobi ik in de letzten Johren mehr un mehr lehrt heff, mien Goorn gewähren to laten.

Männicheen Plant is opstunns dor oder ok weg. Planten, de ik nie nich plant heff, föhlt sik bannig wohl. Meist is dat woll ‚Unkruut', wasst vun alleen, bruukt keen Pleeg. Muttst blots oppassen, dat sik dat nich allens to dull utsaamt. Denn nimmmt dat överhand. Also bitieden afsnieden un nich oppen Kompost!
Biotonne oder af dor mit in en groten Papeersack, opdrögen laten, in'n Ammer schüddeln un bi't Spazerengahn in Woold un Wischen an de Weegkanten verstreuen.
Nevenbi ‚Unkruut'! Veel vun dat wat wi ‚Stauden' nöömt un düer betahlt, wasst annerwarts ok wild as ‚Unkruut'.
Mien leefst Unkruut, den Löwenzahn, dreih ik af, ehr dat de Pusteblomen opblöht. De Wuddel blifft in de Eer, un so warrt de Blötenbusch jeedeen Johr grötter.

Jichtenswann opdükert, vun mi nie nich plant, viellicht vun de Vörbesitters?
Veel Saden luert ja Johrteihnten inne Eer un töövt op en passlich Wassdomstiet. Blots en poor Sommers lang harrn wi t. B. Kornrade nich blots in'n Goorn, man ok an Gravens in't Dörp.
Mal hier, mal dor un dankbor för Nixdoon sünd u.a.: Fingerhüte, Akelei, Königs- und Nachtkerzen, Gänseblümchen, Ringelblumen, Glockenblumen, Schnee- und Hasenglöckchen, Buschwindröschen, Maiglöckchen, Scharbockskraut, Kamille, Habichtskraut, Weidenröschen, Goldrute, Goldfelberich, Schafgarbe, Johanniskraut, Borretsch, Sumpfdotterblume, Lerchensporn rosa un geel, Veilchen, Walderdberen, Franzosenkraut, Giersch, Blutweiderich, Taub- und Brennnesseln, Gundermann, Günsel, Waldmeister, Bärlauch, Schwertlilien, Lungenkraut, Frauenmantel un wat nich allens.
Veel vun de plattdüütschen Naams vun Planten kenn ik (noch) nich. Se sünd aver ok heel ünnerscheedlich sogor vun Dörp to Dörp.

Ik heff mi jümmers veel Gedanken maakt, wat un wo ik op miene knapp 800 Quadratmeter wat planten schull. Mal güng dat goot, mal inne Büx. Faken heff ik ümplant, nie'e Planten köfft, ole oppen Kompost smeten.
Jeedeen Goornutstillen, Plantenbook oder ‚Dag vun de apen Goornpoort' hett mi op Trapp brocht. Besünners de ‚Nachrichten aus dem Garten' vun Jürgen Dahl hefft mi aver al fröh so'n beten vun dat heel Akrate vun miene Omas wegbrocht. Ofschoonst op Dahl sien ‚Lindenhof' bi Kleve ok allens heel ‚oprüümt' is.

Un faken hefft wi sinneert, wat dat nich schöön weer, wenn wi vun den Acker achter't Huus nich noch so'n Striepen afkregen kunnen.
Wi harrn ja noch so veel Infäll!