Dei Artemis-II-Mission:
Countdown!

van Ludgerd Lüske

SLS mit Orion up dei Startstäe. Bild-Daoten: NASA

Dat Daoltellen löpp för den NASA-Artemis-II-Testflug in dat Kennedy Ruumfohrt-Zentrum in Florida. Dei Lüe van dei Start-Mannschkup gaoht an ehre Bildscherm-Dischke. Dei Daoltell-Uhr fang an üm 22:44 Uhr (UTC) un tellt hen nao eine plaonte Start-Tied van 0:44 Uhr (UTC) an’n 2. April. UTC is dei Greenwich-Tiet, in Düütschland is dat al 1 Stünn laoter. Also is dei Start düsse Nacht Klock 1.44 — wenn allens good gaiht.

Artemis-II is dei eierste bemannte Start van dei NASA-SLS-Rakete mit dat Orion-Ruumschipp. Wenn dat Daoltellen offiziell los gaohn is, stellt dei Ingenieure dei Stüer-Computers an, kiekt nao, off dei Kommunikation gaiht. Dei Kryogen-Tank-Systeme van dei Rakete werd för dat orig nau afflopen Uptanken praot maokt. So tankt man hunnerduusende Liter superkolden, fleiten Waoterstoff un fleiten Suerstoff in dei grote Maond-Rakete. Up dei Start-Stäe 39B tankt dei Start-Mannschkup dat Waoter in dat grote Gägen-Larm-System, dat wohrt dei Rakete bi den Start mit eine Waoterwand för den Driew-Wark-Larm.

Originaol-Banner. Bild-Daoten: NASA - ännert

Dei Artemis-II-Mannschkup bliff eiers noch in dei Astronauten-Rüme in dat NASA-Leit- un Affreise-Huus. Dei Lüe van disse Mannschkup maokt sick fardig för den Insatz un kiekt dei Technik nao. Dorbi werd orig nau in Quarantäne up ehre Gesundheit achtet un sei werd uck noch medizinischk ünnersöcht. So schäöllt sei bi den Start gesund praot staohn. Dortau giff et uck einen Schlaop-Plaon un einen Plaon för ehr Äten. So sorgt man dorför, dat sei bi den Start naug Energie häbbt un dei Waoter-Hushölgen pass is. Tau dei neisten Daoten van den Raketentaustand un van dat Weer kriegt dei Astronauten staodig Naoricht.

NASA- un Weer-Experten van dat Weltruum-Start-Zentrum Delta 45 achtet dorbi nau up dat Weer, vördem man uptanken dait. Dei Weer-Daoten wiest mit 80% an, dat ein passen Start-Weer dor is. Wulken un Storm käönt in disse Gägen faoken vörkaomen. Dorup mutt man bi den Start alltied nau achten.

Up den YouTube-Kanaol van dei NASA un up NASA+ werd dat heile Wark äöwerdraogen!

Hier ein Bild van den Start — as Kunstwark in'n Stil van August Macke, wieldat dei echte Start ja noch nich wier.

Dei Maondrakete stigg up. Bild-Idee: Ludgerd Lüske, Microsoft

Video: NASA's Artemis II L-2 Countdown Status News Conference (March 30, 2026)
Artikel: Countdown der Artemis-II-Startmission der NASA beginnt – NASA