Mit Biller dör dat Johr 2021

Mit Biller dör dat Johr 2021 Mai Biller vun Hildegard Tölke, Verse vun Marlou Lessing Sei käönt dei Biller mit'n Anklick vergröttern. Trügge geiht dat denn mit den Zurück-Knoop (Trügg-Knoop) in den Browser (Bruuser).
För Heinrich Vogeler Woorst boren dor, neem Barken stunnen, fragil, schuug, melancholisch-schöön. So barkenjung de Welt un gröön — dör slanke Stämm vun wieden sehn — du hest ehr söcht un nienich funnen. De Bark kient gau, is gau vergahn. Keen dusendjöhrig Denkmal blifft. Dien Hart trock di op wiede Drift bet in en Graff in Kasachstan. Du büst verweiht, verblöht, vergahn, vergahn ok de Erinnerung — dien Graffsprook, den dien Biller schrifft in Klöören, de de Bark di gifft, heet: 'keen vergeiht, blifft barkenjung.
2.5.2021