|
Hund sünner Been
De Knevel hollt en Stück Holt van sowat twintig maal fievteihn
maal teihn Zentimeters in de linke Hand. In de rechte Hand hett
he ut Moder hör Kökenschuuvlaa en Ketuffelschillmest.
Daarmit sniddjet he an dat Stück Holt herum.

He sitt up de Footdeel, de Tungspitz tüsken de Tannen.
Um sük to höört un sücht he nix. He will
wat Besünners warken. Wat nu noch en holten Veerkant is,
sall maal en Hund worden.
De Kontuur van Hals un Rügg lett al heel good. Nu geiht
he eerstmaal daaran, de Kopp to förmen. Dat kriggt he best
vermeet. Twee upstellt Ohren worden düdelk. Muul un Ogen
worden versichtig utkarvt.
Nu mutt de runne Liev utsniddjet worden. Dat Achterdeel mit
en anleggt Steert kummt vandag. Dat düürt all sien
Sett. Man good Wark will Wiel hebben. Van Tied to Tied hollt
he, wat en Hund daarstellen sall, mit stiev Arms van sük
of. He is tofree mit sien Arbeid. Daar an de Buuk kann
noch en bietje weg. De Hals düürt ok wat slanker.
He bekickt sük dat Warkstück van alle Sieden
un tomaal stahn Tranen in sien Ogen. He reert so sacht. Deit
sehr, hum so to sehn.
De Vader kummt un striekt hum over 't Haar. He sücht dat
Elend. He fraggt.
"Ik hebb de Benen vergeten. Un nu is dat Holt na unnern
to minn. Daar krieg ik kenn Benen mehr d'rut!"
"Du kunnst de Benen extra snieden un denn ankleven."
"Nee, dat is mi nix to. De Hund sull doch ut een Stück.
Un nu hebb ik ok heel keen Lüst mehr."
"Wacht ins! Hest du al maal en Hund sünner Benen sehn?"
De lütte Fent snukert: "Dat gifft 't neet."
"Overlegg doch maal! Wennher kannst du bi en Hund keen
Been sehn?"
"Wenn de Hund swemmt."
"Genau! Wenn de Hund hundjet."
Upmaal word dat lüttje Gesicht hell. De Ogen lüchten
weer. 
Kevel haalt sük en Bredd ut Vader sien Warkstee van sowat
fievteihn maal teihn Zentimeters. In de Midde deit he dat Holt
utkarven, dat de Hunnliev daar inpasst. He snidd noch en paar
Wellen an elke Sied van de Dell. Denn kleevt he de Hund mit
de Buuk in de Dell.
Dat lüttje Künstwark lett sük ok anmalen, de
Hund in Bruun, dat Water in Blau un de Wellen mit en Spier Witt
an de Spitzen.
Klaar.
|