Volkstruurdag 2026

Nadenkerie vun Marlou Lessing


He warrt ünner mennig Völker richten un mächtige Völker in all Weltgegenden trechtwiesen. Un se warrt ehr Sweerter to Ploogscharen maken un ehr Pieken to Seißen. Keen Volk warrt gegen anner dat Sweert föhren, ja se warrt överhaupt nich mehr kämpen lehren. Jedereen warrt ünner sienen Wienstock un Fiegenboom wahnen, un keen Schrecken warrt op ehr kamen. Denn Gott sien Mund hett dat so seggt.

Prophet Micha, Kap. 4

Wi leevt in'n Krieg. Nee, he is noch nich utbraken — nich bi uns —, man he is präsent, sien bedrauhlich Düüsternis lücht na uns röver. Un de jungen Manns- und Fruunsminschen ströömt na de Bundswehr, lehrt sik verdeffendeeren, sik un annere — dat verdeffendeeren, wat uns wichtig is: Frieheit, Demokratie... Freden?


Statue vör de UN in New York.
Bild: Neptuul/wikimedia commons

Hebbt wi bloots de Wahl, een dorvun to behollen? Ik kann't nich seggen. De Ukraine harr de Wahl twüschen Freden un ehr Frieheit; se hebbt sik för de Frieheit entscheden un kämpt noch hüüt dorför, na teihndusende Dode, un mien Hart is op ehr Siet. Weer ik Ukrainerin, wöör ik sachs ok kämpen, Drohnen buun orr lenken... Ja, dat gifft mennigmaal Saken, de uns Minschen wichtiger sünd as Freden. Gifft welk, de köönt ahn Freden, avers nich ahn Frieheit. Böse Minschen sünd vele Saken wichtiger: ehr egen Winst, ehr egen Iedelkeit, ehr egen Macht... Solk draagt den Krieg in de Welt. Un al hüüt kost de Krieg, de enerwegens in de Welt is, uns Sellschapen Milliarden — kost nich bloots Geld, sünnern ok Schangsen un Gerechtigkeit, de een mit dat vele Geld harr schaffen kunnt. De böse Geist vun'n Krieg kost uns ok den Freden mit de Natuur, uns Tokumst — un opletzt unsen binneren Freden, denn allens dat wiestowarrn verbittert uns un maakt uns krank.

Krieg is ok in de Welt, 'neem dat üm den Existenzkampf geiht. De mehrsten Minschen leevt in en Tostand vun Konkurrenz, Wedderstriet, vun Fritt-orr-starv, Amboss-orr-Hamer-Ween. Wat de een mehr kriggt, krigg ik minner; wenn he de Winner is, bün ik de Verlerer. Den annern ween laten, gewähren laten, kamen un sik entfolen laten, em mit Wohlwilln tomööt kamen —— dat geiht bloots, wenn een sülvst keen Bang hebben mutt, wenn een sik seker föhlen kann. Ik leev un bün frie, un du schast ok leven un frie ween. — In solk Ümgeven kann wat wassen, diegen, sik entfolen, sik utprobeern; Nieges kann tostann kamen, Glück kann warden. Echtes Glück — nich bloots dat Glück, den Konkurrenten övermann to ween un de neegste Runde to överleven, un noch een Runn, un noch een, as de versklaavten Gladiatoren in de Kampf-Arena — 'neem amenn doch all togrunn gaht.

Düssen Freden, de in Frieheit besteiht, köönt wi vun Gott lehren, denn he is göttlich. Bi Gott mutt nüms wählen twüschen Freden un Frieheit. Bi Gott is mien Recht dien Recht, mien Wohlstand dien Wohlstand, mien Glück dien Glück. To düsse Frieheit hett Gott uns beropen, ehr to leven hett he uns maakt. Nix Ringers is Gott sien Plaan mit uns: Wi schallt al in düsse Welt sienen Freden wohr maken. Wi köönt sachs nich op een Slag de groten Prblemen vun de Welt lösen; man fangt wi an — maakt wi Gott sienen Freden wohr in uns binnersten Krink, in uns Dörp orr Stadt, un höört wi nich op, bet de göttliche Freden ok de Mächtigsten anröögt hett — de ja faken de Ärmsten sünd vör Gott.


15.11..2026


na baven