 |
„Dat Wannern is den Müllers Lust“ vun Addi Kahl De ierste Text-Rieg vun düt Volksleed för Wannerfrünnen erklingt, un glieks kümmt di dat ole Wannerleed in’n Kopp, un du müchst nachmaal mitlopen. Avers dat is ok en Duurthema, wenn du middewiel to de Senioren höörst un de allermehrsten mit de Hölp vun moderne Medizin un Tabletten all utstafeert sünd mit Ersatzlinsen in de Ogen, villiggt poor niege Titan-Knee un de ominösen Rullators (Schuufwagens) för de längere Strecken, wieldat dösige Treppen den Togang nich tolaten. — Bi ’t Eten bind man öllere Lüüd en Slapperlatz üm den Hals, un denn mööt se verdammig insichtig sien, wenn Lüüd di maal hölpen wüll’n. — Mitkriegen deit man dat, wenn Starrsinn de Insicht överhaalt. Tja, Mobilität ünner Senioren — Nee, nich bloots Mobilität, nee, Reiselust! Woanns kann man eegentlich vör de drauhende Föhrerschiensperre weglopen, wieldat Reakschoonen un dat Sekerheitgeföhl an ’t Autostüür nich mehr funktioneert? — „Opa, bi Glatties un Snee muttst du schöön to Huus blieven, hüürst du?“ — So uns Grootenkel.
Woneem sünd se bloots bleven, düsse tomehrst goden Dagen vun uns Jugendtieden? — Uns Snack as Troost in uns Leven würr jümmers aktueller: „Du, uns Olen kann so licht nix ümhau’n!" — Dat Thema weer ja wiet weg! Sport un Spill in jedeen Form in Vereene, ok dat Drapen in Frünnenkrinks? — Bannig swierig wurrn, un de Frünnen sünd villiggt ok al op ’n Steen vun Gottsacker to finnen. Omas un Opas wüürn in ehr Wunschdenken geern nochmaal mitwannern, avers veele Vereene ward jümmers lütter un vergreist so suutje. — Kegeln gahn, handmaakte Musik erleven, Schüttenfeste? Nee, gottsleider för uns Olen teemlich vörbi! Ok al normaal Fohrradföhren is totaal out un vull grote Sturz-Gefohr, un dat strengt an. Ok de luutloos ranruuschenden E-Bikes maakt mit öllere Fohrers eegentlich, wat se wüll’n, un Jüngere schriet di respektlos an: „Gah dor maal ’n beten to Siet, Opa!“ Goot weer en Fohrstohl or en Treppenlift, jüst as de in de TV-Werbung
wiest ward. Ok de iesglatte Baadwann müss eegentlich gegen en
Duschkabine utwesselt warrn, denn ut de Wann kümmst du alleen
nich mehr rut. — Dat sünd bloots poor erlichternde Wünsche
von Senioren. Ok de plietsche Geschenk-Idee vun uns Grootkinner: Villiggt
bruukt Ji so ’n ünnerstützende Hölp un schafft
noch gau de
Wi muteert middewiel to grote "Beterweter" un pleegt de Opreeg-Kultur bi endlose TV-Sportformate. Opletzt harrn wi maal weller so Hartkloppen vör den Grootbildschirm (atemlos, wat so ’n Trainers sik so infallen laten). De Verlierer bi us mutt jümmers vun sien Taschengeld uns Spoorswien fodern, welkeen vun de veelen Senders mien Fru or mi to Pass kümmt. — To bruken sünd uns Spoorgroschen villiggt för Korturlaube, to ’n Bispill de "Knust" (Fehmarn) or ’n Besöök bi Hagenbeck in Hamboorg, wo wi ja mitföhlen könnt, wenn man insparrt ward. — Sri-Lanka, Hawaii, de Malediven, de Welt ümrunnen as ’n Hoochtietsgaav, opletzt villiggt ok noch Gröönland? — Nee, bloots ni nich, dor musst du womööglich den niegen Besitter Donald Trump de smeerige Hannen schüddeln, dat Luurletzte weer dat! Nee, laat dat man junge Lüüd maken. De öllere Generaschoon hett hüüt even bloots ganz bescheidene Reiseteele, un fröher harrn wi ok keen grote Rosinen in'n Kopp — wi weern fröher mit uns Lorelei-Felsen an'n Rhein un de Rüdesheimer Drosselgass tofreden, or wi harrn uns en Tüüt mit rosa Krabben in'n Haven bi de Fischkutters köfft un dat Utpulen möök Spooß ahn Ennen un noch mehr Kohldamp.
Bi uns in Hobbykeller hängt siet poor Wuchen as goode Raat vun usern Navern Ulli, vun Beroop Scheidungsanwalt, en moderne Dartschiev. — För dat Mit-de-Piele-Smieten wesselt wi gegensietig dorop dat jewielige Foto vun uns ut un könnt so doch tominnst nawiesen, wo deep de Leevde noch sitten deit. Mien Fru is oftins de Winner, wieldat se bannig dat „Miene-Snuut-drapen“ öven deit. Ik ünnerstütz se as Mootmaker: „Maak so wieder, du schockst villiggt noch de gröttsten Cracks bi de Dart-WM!“ De warrt denn ganz schön wunnerwarken, wenn op ehr Dartschiev mien Porträtt backen deit! Totaal anseggt bi Senioren sünd ja ok de Krüüzfohrten. Muttst di nich veel rögen, kümmst aver rüm! Föhrte Wannertouren över Droomschepen un moderne Dartsalons sünd vun Werbeprofis an Groot-Reedereien as niegste Geldmaschien-Idee in ’t Boordprogramm opnommen un ok verköfft wurrn. Dormit kann man fallgefährdete Senioren:innen mit so’n Rönner noch mehr Geld ut dat smalle Renterkonto locken. — Gesundheits-Docs staht dor ok glieks paraat. — Wat för Utsichten un Dummtüüch-Vertellers inclusive Frisöör- un Beauty-Salons, Speelkasinos, Kladderwännen un Iesstockscheten, un allens, üm an dien Spoorgroschen to komen. — Dat Kriminelle ok jümmers weller mit Schock-Telefonate to Milljoonen Euros komen könnt, is kum to begriepen. Wat för ene Welt is uns Leven bloots wurrn…..?
Also, Ahoi, leeve Senioren:innen, ik sluut hier mit een Volksleed, dat speelt mien Fru ok to geern op ehr ’n Snutenhobel, wenn se jüst in de Köök maal nix to doon hett, un dorna kümmt de begöschende Melodie: Dat warrt ja allens weller goot, bloots ganz lütt
beten Moot, Vertellen wull ik noch to dat Leed "Dat Wannern...". De Text is vun Wilhelm Müller, en Dichter ut de romantische Epoch, leevt hett he vun 1794 bit 1827. Tja, oolt wurrn is he bi sien Wannerwünsch gottsleider nich — ji könnt maal nareken, wieldat dat Bregentraining goot gegen dat Vergeternwarrn is! Training — un Humor. Den hett bekanntlich, wer liekers lachen kann…
19.4.2026
|
