Unisex

vun Behrend Böckmann

Uni süll dat Denken sien
twüschen Moskau un Berlin,
doch dei Minsch hett sik besunnen
un dat Uni is verschwunnen.

Antööch wiern för alle gliek
in dat grote Mao-Riek,
doch dei Antööch in drei Farwen*
wull dei Minschheit denn nich arwen.

Up 'n Unisex-Klosett
finnen Mann un Fru dat nett,
denn männigein gifft anne Wand
siene Wünsch för all bekannt.

Tominnst op Tö hett düsse Wand
mang Fru un Mann hüüt noch Bestand!

Anner Lüd daun düchtig spotten
œwer Unisex-Klamotten,
dei sik nå den Lief hentrecken
un so alleilei afdecken.

Frugenslüd måken ok mit
bi'n Buzzcut, dissen Stoppelschnitt;
Wat Mannslüd schmückt an Kopp un Krågen,
will'n nu ok Emanzen drågen!

Woso dei ünnerscheedlich Snitt?!
Ein Minsch vun hüüt mååkt dat nich mit!
Un vun dei Klören ganz tau swiegen!
Rosa un blau, na dat's gediegen!

Un Unisex as Genderspråk,
wat wier dat för 'n fiene Såk!
Man is Fru un man is Mann
un wat 'n süss noch so sien kann.

Tau dei unisexen Nåmen
sünd Eike hei un sei denn kåmen,
doch för väle, väle Johr
wier Korl Maria all mål dor.

Sühst nau, wat Wief un Heken sünd!
Doch unisex is hier dat Kind!

Dörch Unisex ward mit 'n Mål
'n oller Minschenwunsch real:
lött Unisex dei Büxen rünner,
kriegen Mannslüd ok dei Kinner!

* drei Farben: Indigo för Buern un Arbeiter, Khaki för Suldaten
vonne Volksbefreiungsarmee, Gries för Parteikader