Oma-Dag an'n 11.10.
Größing sitt nich mihr up'e Åbenbank

vun Behrend Böckmann

Größing, dat wier taun mien Kinnertiet 'n öllerhafte Fru mit 'n Dutt un düster Kleider in blåch, brun un schwatt mit helle Striepen orrer lütte Blaumen, dei noch ehr Strümp un Ünnerbüxen knütten däd, för Kœk un Stuf Kamelhoorpüschen un för Hoff un Goorn Höltentüffel harr, uns Kinner mål för 'n leiwen Schietermoors un mål för 'n Schwienspödder höll, dei inne düster Johrestiet mit'n Rügg an'n Kachelåben seet, uns Görn inne Schummerstünn Märken vertellt un von Tiet tau Tiet 'n Bratappel in't Åbenrohr lecht hett.

Ditt Bild von Größing harr wull ok Heintje, as hei 1967 süng:

Größing so leiw, Größing so nett...
Du büst mien leiwet Größing, dei leiwste vonne Welt,
bi di dörp ik allens, so as mi dat geföllt...

Größing so leiw, Größing ik ihr,
ach wenn för mi mien leiw Größing nich wier...

Un Karel Gott lecht 1981 mit sien Lied Babička nå:

Singen, danzen, schmüstern, glücklich måken —
dat wier Babička ...
Pier stibitzen, Äppel schellen un vertellen —
dat wier Babička...

Doch dei Frugenslüd hemm' dei Büxen för sik entdeckt, leeten sik bi'n Hoorschnieder upfidummen, harrn dei Schnut vull von't blot Huusfru-Sien, güngen 'n Arbeit nå, verdeinen up eins ehr eigen Geld un warden so Größings von 'n anner Oort.

Sogor inne Poletik mischen Größings mit. So grünnt Trude Unruh (1925-2021), dei dat taun Chefsekretärin bi Krupp in Essen bröcht harr un näbenbi ok politsch aktiv wier, 1975 den "Seniorenschutzbund Griese Panther" un 1989 dei Partei "Dei Griesen — griese Panther" un hett dat sogor in'n Bundsdach schafft. Disse Lütte Partei löst sik denn up, grünnt sik nie un hett noch in'n Süden vonne Republik Landsverbänn.

Monika Salzer (Johrhgang 1948) ut Wien is Psychotherapeutin un evangel'sche Preistersch, befåt sik mit dat, wat sik 'n Zivilgesellschaft näumt un grünnt 2017 as Börgerinitiative dei Plattform "Omas gegen Rechts e.V." mit so anne hunnert Arbeitsgruppen in Düütschland un Südtirol, dei sik vörnåhmen hemm', dei Demokratie tau schützen un den Minschen dei Angst vör Frömde tau nähmen, dormit dei Minschenihr erhollen blifft un Faschismus, Rassismus, Antisemitismus un Frugensfiendlichkeit in uns Gesellschaft keinen Platz finnen. För dissen Insatz hemm's sogor 2024 den Frädenspries Aachen krägen.

Anner Größings hemm' sik an Greta Thunbarch un Luisa Niebuer 'n Ogenspeigel nåhmen un willen ok dei Fridays for Future-Ümtööch för Rentjähs organisieren. Un Oma Cordula Weimann (Johrgang 1959) ut Leipzig grünnt 2019 den Verein "Leben im Einklang mit der Natur e.V.", dei sik dat taun Upgåf måkt, Minschen tau verkloren, wat's gägen dei Ümweltkris daun kœnen — un kümmt denn up den Infall, dei Bewägung "Omas for Future" tau grünnen. Nu hett's sogor 'n Bauk "Omas for Future — Handeln! Aus Liebe zum Leben" schräben. Dat finnt ok Anklang bi all dei Rentjähs, dei sik giern mit dei Aktivisten vonne Letzt Generatschon verbünnt harrn, œwer dat Ankläben up Stråten denn doch nich so gaut för öllere Lüd hollen. Œwer marschiern, dat geiht noch; un so gifft dat all 80 Regionalgruppen "Omas un Opas for future" in't Düütschland, blot in Mäkelnborg-Vörpommern noch nich. Dat will 'n Rentjähpor ut Rostock nich länger so hennähmen un söcht inne Tiedung nu noch beinig Omas un Opas, dei för 'n bädere Klimapoletik mit up'e Stråt gåhn, üm 'n gräune, gesunne, läbenswierte un minschengerechte Ierd tau schaffen. Un so ward ut den Oma-Dach inne Spälschaul dei Bewägung "Omas för future"!

Wenn wi Olen al so krägel un dei Taukunft taugewandt sünd, denn kriegen dei Jüngeren doch wisslich ok dei Kurv, wat?