Dat "Little-Man-Syndrom"

vun Behrend Böckmann

Syndrome

Paul hürt nich tau, schnackt wenn hei will,
kiekt inne Luft, höllt nie nich still,
blädert giern, målt nich den Bom,
hei deit sik dick mit sien Syndrom:
Hei möt von Bewägung läben,
frieen Lop sien Unrauh gäben,
uptaupassen föllt em schwor,
hei zappelt giern, ok dat is wohr,
un dit Verhollen ward in't Land
"Zappelphilipp-Syndrom"* nannt.

Hett einer in sien Arbeitsläben
allens för sien Arbeit gäben
un up einmål löppt nix mihr,
un Dit un Dat, dat plåcht di sihr,
ümmer mäud un Koppweihdåch,
dortau Kniepen in den Måch,
dei besten Frünn' geihst ut'n Wech,
höllst di sülben för't gröttst Pech,
un büst in'n Stillen di all wiss,
dat dat 'n böser Börnut** is,
dat 'n Dit un Dat annimmt
un nich weit, woher dat kümmt,
man nich dei Symptome kennt
un dat dorüm "Syndrom" nu nennt.

In't Märken hemm ok Dwargen Kinner, lütte Mannslüüd ok nich minner!

'n Symptom as Hausten, Schnuppen
ward sik as 'n Gripp entpuppen,
bi Masseln*** is dei Lief vull Placken,
bi Dörchmarsch blifft kein Äten hacken;
höllst dat Bukkniepen nich ut,
möt oft fix dei Blinddarm rut;
bi Gälsük is dei Läwer krank,
Gelenkerieten sühst an'n Gang,
un wenn man dei Symptome nennt,
dei Dokter fix dei Krankheit kennt.

Bi'n Syndrom süht't anners ut,
dor möt nix rin, dor möt nix rut,
dor kümmt blot allerlei tauhop
un nimmt denn sienen Syndrom-Loop,
hunnert Symptoms un noch mihr
quälen einen Minschen sihr,
doch dei Wöddeln von so'n Qual
sünd mierstendeils "blot" sozial,
un üm Burnout tau œwerwinnen,
möt man ein'n Mediator finnen,
tau ein' klauken Minschen gåhn,
taun Heiler orrer ok Schamån,
dei sik denn för gaudet Geld
mit di gådlich ünnerhöllt,
di as Minsch wedder uprüst,
di verklort, wecker du büst,
dat du mösst dat Mul uprieten
as dei Hääkt ünner dei Plieten.

Wenn schnacken nu nich helpen deit,
dei Fachmann sülfst nich wieder weit,
deit man Psychologen bäden,
versäuken't nu mit Seelenknäden,
willen säuken dei Symptom
för so männig bös Syndrom.

Knopbuurd un Räkner möten ran,
ik fang nu dull tau bütschern an,
un niegelich, as ik so bün,
bald allerlei Symdrome fünn:
dat Reizdarm- un dat Down-Syndrom,
Little Man-, Entzugssyndrom
un noch väle anner Nåmen
sünd up eins mi ünnerkåmen.

Dat "Little-Man-Syndrom"

Dei "Little Man" måkt mi perplex,
dei ok "Napoleon-Komplex",
ok "short man syndrome" heit,
dat dat üm lütte Mannslüd geiht
un ik nu gor nich anners kann
un fang gliek mit Napoleon an:

Ein Afkåt fünn't wunnerschön,
as Korsika tau Frankriek keem.
As hei denn wier in Gott sien'n Nåmen
taun Schof von dörteihn Kinner kåmen,
dröömt hei dorvon in'n Stillen,
sei in Paris denn uttaubillen,
un fünn dat denn ja ok ganz nett,
dat Sœhn Napoleon wür Kadett
un lihrnt denn dor ok sotauseggen,
woans man möt denn Füer leggen.
Den Jungen as dei Lüttst von allen
däd disse Såk ok sihr gefallen,
as General, einssœbentig grot,
bröcht hei väle Minschen Not,
un so is doch dei Lüdschnack wohr:
Lütt dei Kierl, grot dei Gefohr!

Na Gefahr süht hei nich ut,
man wat bargt hei ünnern Hut?

So wiet dat för den Korsen stimmt,
dei Welt von Goethe ok annimmt,
dat sien Gefäuhl von Storm un Drang
måkte väle Minschen bang,
un so männig Fründ befünn,
dat giern in'n Middelpunkt hei stünn,
dei inne Sellschap wier tau Stell
as ein griesgräm'sche Språkrebell.

Dei Tüffelanbu geiht åhn Witz
taurüch up unsen Ollen Fritz,
un disse König wier man blot
ein Meter tweiunsössdig grot,
hett sik in sien Königsläben
giern mit schmucke Kierls afgäben,
hei spälte Fläut un ok Spinett,
fünn't Exerzieren ganz adrett,
schnackte œwer Philosophie
mit Voltaire up Sanssouci,
måkt dörch Krieg un mit Bedacht
ut Prussen eine grote Macht,
däd as König nie nich klågen,
dat hei künn as Kierl versågen
un as Rieder hoch tau Pierd
wier hei grot, wür dull verihrt
un in Berlin, Ünner dei Linnen,
kann man em as Denkmål finnen.

Nee, düt is nich dei ole Fritz,
man hei hett ok ein feine Mütz!

För den König up den Thron
geef dat 'n Garde-Bataillon,
dat œwerall in't Prussenland
as dei "Langen Kierls" bekannt;
einsachtunachtig wier dat Måt
för so'n Grenadier-Soldåt,
doch Fiete hett dat nich gefollen,
por Dusend gaut tau ünnerhollen,
dei nie nich hemm' ehr Arbeid dån
as dei Schwiezer Gard in'n Vatikån.

As denn gägen nägenteihnhunnert
œwer dei Psychoanalys wür wunnert,
'n Dokter Adler**** up 'n Infall keem
un sik dei lütten Kierls vörnähm,
wull ergrünnen, ob't wull wohr,
dat lütte Kierls sünd ein Gefohr.

Sühst du em hier, kunnst du finnen:
Lütte Kierls sünd Blaumenfrünnen!

Gliek tauierst is em upfollen:
afgünstig Lütte sik verhollen,
dat s' up Anseihn sünd bedacht,
feninsch warden, wenn einer lacht;
noch anner sünd dorför bekannt,
dat s' mit ehrn Kopp will'n dörch dei Wand.
Oftmåls hemm' lütte Kierls dat lied
un säuken giern mit anner Striet,
un noch anner deit dat quälen,
wenn s' nich dei ierste Geig daun spälen.

Dat sall för all dei Lütten gellen,
dei as Grött einssœmtig tellen,
doch af un an man Mannslüd finnt,
dei lütter as einssössdig sünd:
Opernssänger Joseph Schmidt
harr Gold inne Kähl un wier sihr lütt,
hei hett sik up'n Schemel stellt
un süng "Ein Lied geiht üm dei Welt".
Balzac schreef — ok von lütt Statur —
"Le Père Goriot" as Weltliteratur,
Kaffe wier sien ganzet Läben
un äbenso dat Geldutgäben.

Ja, Blaumenfrünnen sünd sei wiss,
ok düsse, dei ein Blaum sülwst is!

So gellt dei Schnack all hunnert Johr:
Lütt dei Kierl, grot dei Gefohr,
un all, dei üm einssössdig sünd,
hemm' beläwt, as sei wiern Kind,
dat dei Groten sünd ankåmen
un brüden s' mit'n Ökelnåmen,
wat männigeinen wür 'n Last,
un inne Brägenachterstuf ***** sitt fast.
Dei Psycholog will nu rutfinnen
un dörch 'n Analyys ergrünnen,
worüm sik Lütte anners gäben,
as wenn sei würn as Grote läben.
Hei ward nu ehre Seelen knäden,
œwer Dit un Dat denn räden
un mit dei Lütten in Vertrugen
'n nieget Wiertgefäuhl upbugen.

In't niege Johrdusend in Kanada,
ganz inne Neech von Alaska,
künn Paulus****** dat nich ünnerlåten,
deit sik mit lütte Kierls befåten,
ünnersöcht s' von vörn un hinnen
un deit den "düstern Dreiklang" finnen
för dat "Little-Man-Syndrom"
nå dei Grött von den Napoleon
un dei Spychologen weiten,
dat dat "Dark Triad" deit heiten.

Hei sitt in't Düüster, mit Latücht,
dat hei dei "Dark Triade" lücht!

So sall dat ierstens Lütte gäben,
dei willen as dei Gröttsten läben:
'n anner Minsch för sei nich tellt.
"Narzissten" nömen sei düss Schof.
Sei kennen ja — sei wiern nich doof —
Narcissus inne Sagenwelt
dei in'n Sot in'n Wedderschien
wull allein dei Allerbest denn sien,
dei ümmer up sik sülfst bedacht,
bewunnert ward in all sien Pracht.
Ok wenn ik lütt, ik lütter Mann,
bewunnert mi, wat ik allens kann!

Tweitens gifft't lütt Kierls in't Land,
dei will'n mit Kopp giern dörch dei Wand,
sei schlieken sik ganz sachtens an
un måken, wat man måken kann,
un sünd besünners up bedacht,
dat s' gelangen tau groot Macht,
dorbi scharp un bissig schnacken,
achtertücks dull biestig racken.
Sei sünd sik åhn Geweiten wiss,
"Wat mutt, dat mutt" ehr Motto is.
Dees Lütten sall'n beräkend hanneln,
wenn's mit anner Lüd anbanneln,
blot ümmer an sik sülben denken,
an anner keinen Blick verschenken,
wenn't üm den eigen Nutzen geiht,
dat Hart villicht för anner schleit,
för den Groten näbenan,
den hei as Warktüüch bruken kann.

Taun drüdden sall't noch Lütte gäben,
dei, von ehr'n eigen Irsinn dräben,
kein richtig Maat un Ramaat kennen.
Grote daun s' Psychopathen nennen,
dei mit Strafen kalkuliern,
koltbläudig ümherspaziern,
åhn sik tau måken ein Geweiten,
warden sei up anner scheiten,
ut Vergnäugen drücken s' af
un bringen anner fix in't Graff,
einer is den annern Fründ,
as Lütte sei dei Gröttsten sünd.

Dat düss Syndom bloß Mannslüüd drifft,
ein Insicht in uns' Sellschåp gifft:
Von Mannslüüd willn wi Grotes sehn,
un is he bloß ein Lütten een,
denn mutt hei wat tau'n Utgliek doon,
egål man wat, dat finnt sik schon.
Dei Mann mutt jümmers wat bewiesen,
dorüm warrn Lütte Geistesriesen
orr Diktatoren, maken Krieg
orr warden einfach ååsig riek...
Hemm nienich Roh, sünd alltied dräwen —
nee ok, wat is't för'n Elends-Läwen!
De Frugens op dei anner Siet
sünd ganz kommodig, låt sik Tied.
Wiel nüms groot Leistungen verwacht
von Frugens, sträwen s' nich na Macht.
Sei kriegen Anerkennen nauch,
wenn s' nett sünd, moi un halfwechs klauk.
Un wenn sei lütt sünd? Ümso bäter!
Denn föhlt ehr Kierl sik glieks noch gröter...
Dat kann man nu sexistisch nömen —
man is dat nich ein bäter Läwen?
So mennich Mann wöör dorvon drömen
un giern sik mit taufräden gäwen!

Doch ik bün mi würklich wiss,
dat väl dorvon Gesabbel is.
Dei ein'n sünd lütt, dei annern grot,
sei hemm' mit Pråhlen keine Not,
Lütt un Lütt is wunnerschön,
'n grotet Bier, 'n lütter Kœm.

Verkloren:
*ADHS — Aufmerksamkeitsdefizit-Hyperaktivitätsstörung,
**Burnout-Syndrom — ein Taustand von Utbrannsien,
*** Masseln — Masern,
**** Alfred Adler (1870-1937), österreichische Dokter un Psychotherapeut
***** Brägenachterstuf — Unterbewusstsein,
******Delroy Paulhus (Johrgang1946), Kanadier, weltberopen as Professor för
Psychologie an dei Universität von Britsh Colombia

Liste von bekannte lütte (Manns-)Minschen:

Johann Wolfgang von Goethe 1,70, Dichter
Friedrich der Große 1,62, preußischer König, der Alte Fritz
Napoleon Bonaparte 1,67, französischer Kaiser
Wladimir Putin 1,65, mit Hackenschauh 1,70, russischer Präsident
Jaros?aw Kaczy?ski 1,68, polnische Politiker und Vorsitzende der PiS-Partei,
Nicolas Sarkozy 1,65, ehemaliger französische Staatspräsident,
Nikita Sergejewitsch Chruschtschow 1,60, ehemaliger sowjetischer Regierungschef,
Gregor Gysi 1,64, deutscher Linkenpoletiker
Norbert Blüm 1,67, CDU-Poletiker
Helmut Schmidt 1,70, SPD-Bundeskanzler
Ursula von der Leyen 1,61, EU-Kommissionspräsidentin
Gerhard Schröder 1,72, Bundeskanzler
Wolodymyr Selenskyj 1,70, Präsident Ukraine
Charles III. 1,78, König von England
Rishi Sunak 1,70, englischer Parlamentarier
Honoré de Balzac 1,57, französischer Autor
Joseph Schmidt 1,54, österreichischer Opernsänger
Benito Mussolini 1,52, italienischer faschistischer Diktator
Josef Stalin 1,65, Generalsekretär der KPdSU
Adolf Hitler 1,72, faschistischer deutscher Diktator
Josef Goebbels 1,65, Reichspropagandaminister im Dritten Reich
Adolf Eichmann 1,68, NS-Verbrecher

Taun Vergliek:
Donald Trump 1,90, US-Präsident
Mark Rutte 1,93, NATO-Generalsekretär
Friedrich Merz 1,98, Bundeskanzler