Von Klangschöddeln Kinner kriegen

vun Behrend Böckmann

So as Naturheiler mit allerlei Krut ut'e gräune Apteik un Homöopathen mit Ähnlichet dörch Ähnlichet in Verdünnungen gägen Krankheiten vörgåhn, willen Klangheiler Lief un Seel dörch allerlei Kläng von Metallschöddeln behanneln. In Bayern kann man sik för 4.250 € in fief Wäken taun Klangschöddelheiler utbillen låten un denn för 'n Klangschöddelbehandlung von 75 Minuten 140 € von'n Kunnen afkassieren. Dat is dei Råhmen, in den Klangschöddeln ut bestet Metall an un œwer 'n Lief in Schwingungen bröcht warden, wo Lief un Seel den Minschen Sorgen måken. Taun Bispill künn ik läsen, dat 'n Fru nå 'n Operatschon wenig Utsicht up ehr Mudderglück harr, sik denn up 'n Klangschöddelbehandlung inleet un all nå twei Wäken in anner Ümstänn' wier. Von ein anner Fru wür schräben, dat 'n von 'n Operatschon an ehn Ünnerarm wägen 'n inklemmten Nerv nå por Klangschöddelbehandlungen afseihn künn. Un bi 'n Mann von 70 Johren harr man allens gägen sien Knåkenleukämie dån, doch ierst nå 'n drüdde Klangschöddel-Behandlung wiern dei "Wierte" wedder normal. Sülfst 'n Pierd, dat låhmen däd, künn dörch disse Behandlung wedder ornlich gallopieren, un ein unberäkenbor gefährliche Hund wür dörch Klangschöddeln wedder beräkenbor un tamm.

Klangschöddelbehannlung bi Hunnen: Vörher...

...un achterna!

Man mücht an 'n biblisch Wunner glöben, wenn Klangheiler mit den Klang un dei Schwingungen von güllenfarwen Metallschöddeln Geist un Seel von'n Minschen heilen willen, œwer dat Heilen dörch Akupunktur ut China un dei Ayurveda-Heilkunst ut Indien gägen allerlei Weihdåch helpen ja ok — un worüm süllen Pött un Schöddeln ut'e asiatisch Kœk von dunnemåls hütigendåchs as Klangschöddeln in Europa nich ok Minschen heilen?! Disse Schöddeln, mit dei vör Tieden dei Kuttendräger in Tibet von Hus taus Hus gåhn, üm sik Äten tau fechten, hemm' ierst in 'n Westen ehr niege Bedüdung as Klangschöddeln för dei Heilung von Körper, Geist un Seel krägen. För dei Herstellung von disse Klangschalen mit 'n Gewicht von 100g bet por kg sünd sœben Metalle nödig, denn blot so kann 'n Würkung von dei Klangschöddeln in Verbinnung mit dei Planeten utgåhn. Un lött man sik in'n Globen an dei Klangwürkung behanneln, denn mœt 'n sik nich frie måken un ward sotauseggen dörch dei Kledåschen hendörch von binnen massiert.

Dortau licht dei Minsch tauierst up 'n Klangpritsch, dormit dei Klangheiler in 'n Ünnerhollung rutfinnen kann, wo dat in Lief un Seel knacken deit un woans wo denn wecke Klangschöddeln antauschlågen sünd, dormit dat Wåder in dei Zellen dörch dei nödigen Schallwellen för dei Binnenmassag' tau schwingen anfangt, nu göttlich Energie hentau kümmt, niege Energien friesett't warden un sik so dei Bäderung dörch Sülfstheilung instellt.

Bi disse Oort von Behandlung kümmt dei Klangheiler würklich nie nich mit den Kunnen in Berührung, sonnern hei is blot mit dei Schöddeln un ehr Kläng befåt un verstärkt dei Würkung noch mit Gongschlääch un dei Schamanentrummel. Un wenn dei Klangschöddelbehandlung noch bäder helpen sall, denn ward dei Minsch up'e Klangpritsch för dei dubbelte Würkung in Verbinnung mit 'n tweiten Klangheiler in'n Taustand versett't, as wier 'n sibirscher Schaman orrer 'n afrikanscher Späukenkieker an't Wark. Bi disse Oort von Behandlung kümmt noch hentau, dat dei Klangheiler dorvon utgeiht, dat dei Minsch nich blot 'n behöllern Kopp (Gedächtnis) för Läsen, Räken un Schrieben, sonnern ok 'n behöllern Lief (Körpergedächtnis) för einst lihrnte Bewägungen as Radfohren, Schwemmen, Danzen, Klavierspälen usw. hett. Un so kann so'n Klangschöddel-Behandlung 'n Minschen, dei taun Bispill nie nich wedder in't Wåder wull, dor em dei Dodesangst von 'n Bootsunglück bet up den Dach in'n Nacken seet, villicht doch wedder dorhen bringen, dat hei sik œwerwinnt, wedder up'n Kåhn sticht, in't Wåder nich mihr den Dod süht un sik so dei Blockad', dat "Trauma" löst.

Klangschöddeln kœnen œwer ok gaut sien för't Verhålen dörch "In-sik-Gåhn", wenn man von Yoga un Zumba nich väl höllt. Un heff ik twüschendörch mål dacht, dat disse Oort von Heilung orrer Behandlung ok mit Potzlan- orrer Kauhklocken mœglich wier, so bün'k mi nu wiss, dat disse Klocken wull doch nich dat väle Zellwåder in mi taun Schwingen bringen kœnen! Un Kinner kriegen dau ik ok nich mehr dorvon.