'n Backs künn nich schaden?

vun Behrend Böckmann

Kœnen ollich Kinner åhn Backs upwassen? Dat is wull dat, wat bi Goethe sienen "Dokter Faustus" dei Gretchenfråch utmåkt. Wat deit 'n artig orrer unartig Verhollen, ollich orrer unollich Benähmen inne digitale Welt bedüden?
Möten ollig un artig Dierns wiederhen 'n Knicks måken un dei Jungs dienern, wenn's 'n ölleren Minschen "Gauden Dach" seggen?

Olle Rägeln as "Wat achter dei Uhren schrieben", "Wecker nich hüren kann, dei möt fäuhlen" orrer "Di möt 'n mål dat Fell garwen" wiern männigmål mit 'n Backs, 'n Koppnuss, Uhren-lang-Trecken orrer in'n schlimmsten Fall mit 'n Noorsvull verbunnen. Œwer dei 68-er as dei Vörlöper vonne Gräunen sünd ja nich blot för dei sexuelle Revolutschon bekannt, sonnern ok för allerlei niege Erfinnungen, un sei näumten dat denn Demokratisierung un Liberalisierung. Loveparades un CSD-Ümtööch würn gägen Mai- un Ornbierümtööch utschudert, un inne Schaulen süllen dei Schäulers nich mihr dat måken, wat dei Lihrer wull, sonnern dat, wat sei för sik as nödig höllen.

Dat keem ok bi dei niemodschen Öllern an: ehr Kinner sallen anners, äben frieer lihrn. Un ok niemodsche Lihrers schnacken dorvon, dat 'n dat Kind dor "afhålen" möt, wo't sik gråd in sien Entwicklung befinnen deit. Frieer un åpener Ünnericht, Projekt- un Blockünnerricht, Inklusion un friee Waldorf- un Montessorischaulen un väle anner niege Schaul- un Ünnerrichtsansichten warden taun Hannelswor up'n Schaulmarkt. Un dei Schäulers hemm' Rechten, sei kœnen gägen ehrn Lihrer mit 'n Afkåten vörgåhn, wenn irgendwat nich so taupass kümmt, as 'n sik dat dacht hett.

Dei Hierarchien sünd sieder worrn, all sellschåpliche Schichten sünd miehr up Ogenhööcht as tauvör — nich bloß Schäuler, Öllern un Liehrer. Dat is ja nu up ein Siet gaud, hett oewer ok anner Folgen.

Dat, wat taun Größings Tieden "Anstand" näumt wür, dat fählt väle junge Minschen von hüt. Sei bruken ehrn Sitzplatz in'n Bus orrer Båhn nich den ölleren Minschen anbeiden, sei möten taun Gräuten nich ehr Basecap lüften, un wenn s' wat as Gewalt orrer Dwang anseihn, warrt sei vermünnert, dat sei sik dorgägen upböhmen, sogor Opa wägen Belästigung verklågen, wenn hei as tähnloser un all tüdeliger Minsch sien Enkeldochter leifvull stråkt. Un süll 'n Kind mål nå dei Devise "Wecker nich hüren kann, dei möt fäuhlen" 'n Backs infangen, denn kœnen dei Kinner dei eigen Öllern verklågen, denn "Kinder haben ein Recht auf gewaltfreie Erziehung. Körperliche Bestrafungen, seelische Verletzungen und andere entwürdigende Maßnahmen sind unzulässig." Af 2000 is dat dörch Gesetz ok Öllern ünnersecht, ehr eigen Kinner dei Uhren lang tau trecken, 'n Backs tau gäben orrer gor mit 'n Norsvull tau draugen, sülfst wenn s' meinen, dat s' dörch disse Ort von Stråf keinen Schåden up'n Wech taun gauden Minschen nåhmen hemm' un sik hüt mihr as nödig as "Helikopter-Öllern" üm ehrn Nåwuss sorgen. Hentau kümmt noch dei digitale Welt, dei nich ümmer dorför gaut is, dat dei junge Minsch nich ut'e Båhn schmäten ward.

Denker Hegel hett all dorwer simeliert, woans dei Frieheit mit't Gägendeil so tau verbinnen is, dat wat taun Vördeil von jeden Minschen dorbi rutkümmt. Hei hett dat "Dialektik" näumt. Doch dorvon sünd wi afkåmen, inne Marktwirtschaft hett Dialektik nicks tau säuken. Un nu wunnern wi uns, wenn 'n Schäuler as in disse Fäll von 2023 taun Murder warden:

Dor ward dei 6-johrig Joel in Pragsdörp/ Müritzrebeit von'n Schäuler mit'n Metz afmurkst, in 't Hannoversche Wunstorf schmitt 'n Schäuler 'n annern Schäuler mit 'n Stein dod, 'n 8-Klässler in Lohr an'n Main lecht 'n glieköllrigen Kameraden mit 'n Pistol üm orrer 'n 17 Johr oller Schäuler ut Weisenddörp/Mittelfranken stäkt mit 'n Metz sien lütt Schwester dod un verletzt näbenbi noch dei Mudder. Dei Uprägung is grot, woans kann dat blot angåhn, wohen sünd wi kåmen, dor möt sik wat ännern...

Un dat wiern bloß dei Fäll von 2023. Sietdat sünd masse niege dortaukåmen.

Dor krichst dat Nådenken. Dei Kinner, dei Produkte von uns Sellschåp sünd, — düsse Kinner respektiern dei Rägeln nich miehr. Sei griepen sülwst tau Gewalt. Hemm sei Gewalt as "Lösung" in ehr Kinnertiet kennenliehrt? Dat is denn wiss verkiehrt un mutt richtigstellt warrn. Oder kümmt dat dorvon, dat dei Rägeln för sei nienich mit Nådruck klormåkt un dörsett wurrn? Dortau kann ok ein Nådruck tauhüürn, dei physische Gewalt bruukt, wenn Autorität anners nich sekert warrn kann. Nich tauletzt Kinner ut anner Kulturkreise, dei tau'n Bispill ehr Liehrerin nich respektiern, wieldat sei ein Fru is — solk Kinner moeten dei Rägeln ganz klor måkt warrn. För verkehrte Ideåle ut dat Internet gellt dat Lieke.

Wi koenen nich mit Gewalt Gewaltlosigkeit dörsetten. Œwer wi möten dei Rägeln von uns Tausåmenläben vör dei wohren, dei gor nix as ehr eigen Vördeil in'n Sinn hemm.