Horst Wernecke vertellt:

Den König sien Iesenbahn

Oh, dat weer di wat mit de eerste Iesenbahn in't Holsteenland! De däänsche König Frederik de VI., de hier ja dunntomol de Landsherr west is, de weer Füür un Flamm vun den Gedank, jüst as de Bayern 'n egen Iesenbahn in sien Riek to hebben, tomaal dat wirtschaftlich groote Vördelen hebben kunn. He hett glieks 'n Komischoon upstellt, de utklamüstern schull, neem de Bahn langgahn kunn. Klor, in Altona, de tweetgröttste Stadt na Kopenhagen, schullt losgahn, so kunn een Hamborg schön in de Brass bringen. Man woneem schull se in 'n Norrn ankamen? Lübeck keem nicht in Fraag, jüst de frie Stadt wull een ja schaden, also kemen blots Flensborg, Kiel odder Niestadt in Bedracht.

Christian de VIII., de Frederik in 1839 up den Thron I folgen dee, seeg dat Ganze toeerst mehr as 'n Düwelswark an. As avers de Preußen 1842 en Iesenbahn vun Berlin na Stettin rup buun deen, dor keem he doch in't Gruweln. Schulln de sien Hannelsweeg in Holsteen Konkurrenz maken wülln?

De Kielers hebbt den König sien Angst kennt un gau den Börgermester Jensen un de klooken Professers Hansen un Hegewisch na Kopenhagcn schickt. De schulln den König verkloorn, dat dat nu losgahn müss mit de Iesenbahn un dat blots Kiel as Endpunkt in Fraag keem, se harrn den besten Haben un dormit de besten Verbinnungen na de Hauptstadt. Man de König harr 'n ganzen Barg Bedenk un wies sik as 'n beten wat tögerig. Dor hebbt's em vörrekent , dat son en Ünnernehmen öllig Geld in sien Schatull bringen wöör un dat de Finanzierung a'lang stahn dee. De däänsche Regierung schull dorbi de meisten Aktien hebben. Man jüst dat keem den König teemlich düür vör. Denn seen se em, dat se al 'n gooden Inschenöör anhüürt harrn, de al bi de Leipzig-Dresdner Iesenbahn bi west weer, un dat de sik al de Streck langs Bahrenfeld, Eidelstedt, Halstenbek, Pinnbarg, Tornesch, Elmshorn, Horst, Wrist, Niemünster, Bordesholm, Flintbek na Kiel ankeken harr. Man dat weer den König jümmers noch nich na de Mütz.

Bahnhoff Altona 1844

Eerst as de Professer Hegewisch Christian den VIII. en Tiet later in en persönlich Audienz utenannerpulen dee, dat de Hannoveraners en Iesenbahn vun Neddersassen ut över dat Naverland Meckelborg direktemang na de Oostsee rup buun wulln, dor wöör de König meist 'n beten fickerig. Un as Hegewisch em blangenbi vertelln dee, dat de Komischoon de nie Iesenbahn em to Ehren de "König Christian VIII. Ostseebahn" nömen wull, dor hett he sik bumfidelt föhlt un de Saak foorts tostimmt — un groote Iel bi't Trassen- un Schienenverleggen verlangt.

An'n 18. September 1844, den Geburtsdag vun Christian, is de Iesenbahn denn inweiht worrn. För de 105 km lange Streck hett de Tog blots tweienhalf Stünnen bruukt, dat weer rund een Veerdel vun de Tiet, de de Diligence-Ielpost bit dorto bruukt harr! Trotz un alledem weern nich alle Lüüd dorvun övertüügt, dat dat Deert de Tokunft tohöörn wöör, in Sünnerheit nich de Fohrünnernehmers, de jüm ehr Peer nu in'n Stall stellen kunnen. Un de Lüüd, de an de Bahntrass wahnen deen, hebbt dacht, dat se vun den Damp un dat Gedruus vun de Lokomotiven süük warrn kunnen.

De "Verbindungsbahn" dampt över de Lombardsbrüch

Dat Allerwichtigst för düsse Bahn passeer avers an 'n 17. Juli 1866. An düssen Dag wöör de Streck dörch de so nöömte "Verbindungsbahn" an Hamborg anbunnen. Dit Stück weer — wenn een so will — dat letzte Deelstück twüschen Düütschlands Norrn un Süden, denn fief Weeken later wöör Sleswig-Holsteen mitsamst Altona un Kiel 'n preuß'sche Provinz.