In't Schapp ik noch 'n Schöddel fünn
ünner dei "Made in GDR" stünn,
un man finnt noch allerhand
wat as "Made in GDR" bekannt.
Ok in Erichs Lampenlåden
leech dei "lecker" Schwienebråden
up Töller ut't fienst't Potzlan,
dei in Kahla wiern entståhn,
würklich "Made in GDR".
Ok anner Woren wiern begihrt:
stempelt "Made in GDR".

Dei Updruck is allein för sik
all lütt bäten Poletik,
denn annerswo geef't ok ganz nie
Woren "Made in Western Germany";
as "Made in GDR" güng verluurn,
wür "Made in Germany" nie gebuurn.

Doch woans is dat denn kåmen,
dat 'n "Made in Germany" as Nåmen
up all dei düütsche Woren fünn,
dei man in't Britisch Weltriek köpen künn?

As Weltriek wier dei halwe Welt
dei "Queen" up Windsor ünnerstellt,
un dor man tau Victorias* Tieden
düütsche Woren künn nich lieden,
würn's as minnerwertig deklariert
un as "Ramsch" denn degradiert.

Sheffield — as "Steel City" bekannt —
bangt üm Kniefs** "Made in Ingland",
dat düütsche Kniefs in'n Wettlop siegen
un dei ut Ingland ünnerkriegen.
Dormit dat denn nich so wiet keem,
dei Regierung as Gesetz annähm***:
Wat ut Düütschland importiert,
ward as "Made in Gemany" deklariert!
Kniefs ut Düütschland dögen nix!
Düt bloot sull dei Bottschap sien.
Man denn marken dei Höker fix:
Dat Tüüchs ut Solingen is fien!
Dat düütsche Kniefs väl bäder sünd,
as man sei in Sheffield finnt,
dat wüss bilütten jedet Kind.
Wat harr man sik vergaloppiert!
De ganze Saak hett dortau führt,
dat düütsche Wor in alle Welt
as besonners wiertvull gellt.
"Made in Germany" geföllt —
un sik so ok dei Upschrift höllt.

Ok uns Kanzler denkt ganz nie
œwer "Made in Germany",
wiel achter Merz un sien Brandmuern
œwerall dei Bösen luern:
Weidel, Trump, Xi Jinping, Putin,
ok anner künn'n noch böse sien...
Hei will "Europa first" upbugen
un deit nu up Meloni trugen.
Hett hei up Tieden sik besunnen,
as Rom wier mit Berlin verbunnen?

In Rom man em för'n Düütschen höllt,
dei up Europa is instellt,
dei sik dull dormit deit brüsten,
Europa ornlich uptaurüsten,
dei mit militärisch Såken
Europa will tau 'n Weltmacht måken;
un dei Kanzler wünscht sik sihr,
dat Düütschland ward, wat Ingland wier.
Doch dat inglisch Missgeschick
wünscht hei sik as gröttstest Glück:
Up Flœgelschruwer, Fleiger, Drohnen,
Panzer, Flinten un Kanonen
up Raketen, Schäp un jeden Kåhn
sall "Made in Europa" ståhn!

* Die Princess Alexandrina Victoria of Kent (1819-1901) bestieg 1837 as Königin Victoria denn englischen Thron und war bis zu ihrem Lebensende 1901 die englische Königin un später auch die Kaiserin von Indien
**Knife (engl.), Knief (plattdeutsch) — Messer
*** 1887 legte die britische Regierung im "Merchandise Marks Act" fest, dass importierte Waren ein Herkunftszeichen tragen und Waren aus Deutschland mit dem Aufdruck "Made in Germany" deklariert werden müssen