Bummel dör Bremen
Deel 4: Vun Bremer Originalen un ehr Denkmalen

vun Meike Balzer-Fraun


Över de Bremer Originalen kannst veel online över finnen. Dat verlohnt sik! Hier en Översicht ahn Vullständigkeitsgarantie:

In'n Schnoor

Ottjen-Alldag-Brunnen

Dat Denkmal hangt dicht bi't INS (Insitut för Nedderdüütsche Spraak) över en olen Soot (vun en Hoff in Lankenau an de Werser).
Heinrich Schmidt-Barrien ehrt den blinnen Schrieversmann Georg Droste, de de Geschichten vun den plietschen Bremer Jung Ottjen Alldag vertellt hett:

"vun't Ole Bremen
un wo't leevt un lacht
sung uns de Dichtersmann
ut all sien Nacht"


Ottjen Alldag sien Brunnen. Bild: Jürgen Howaldt/wikimedia commons

Baadstuvenbrunnen oder ‚Die fröhlichen Badenden'


Düsse Badenden sünd wirklich quietschfidel.
Bild Till F. Teenck/wikimedia commons

Hier an'n Stavendamm schall dat ‚Staven' (Badestuben) geven hebben. To Huus kunnen de Lüüd sik nich so recht waschen. In de Staven güng dat, man se harrn dor ok ehr Vergnögens un dat geev mitünner ok ‚Heelbehannels' (Fritz Reuter, Bräsig un de Waterkunst).

Heini Holtenbeen (1835-1909)

Sien Denkmal steiht blangen dat Packhuus Theater. Heini harr en Stell bi en Tabakküpermeester, müss de Lehr aver na en Unfall afbreken. He weer lahm un nich mehr ganz klar in'n Kopp. As Deenstmann mit en Handwagen verdeen he twors 'n beten Geld, man dat geev ok Eten in en Armenköök. He beddel nich, he ‚fraag' üm Geld: "Segg mal, kannst mi nich 'n halven Groschen lenen, ik schriev dat in mien Hauptbook in."

Sien leevst Zigarren kreeg he (meist 'n lütt beten ansmöökt) an'n Ingang to de Böörs, wenn de Kooplüüd to Middag güngen. Binnen güll Smöökverbott!

Mudder Hocke (1901-1981)

In de slechten twintiger Johren hett se sik en Dreihorgel kööft, de nödigen Verlööfschiens besorgt un vör allens in de Tiet vun'n Freimarkt dormit Geld verdeent.

Se weer en düchtige Handwarkersche un hett later ehr Geld mit en Dreihorgelverlehn un de nödige Reparaturwarksteed maakt.

För se gifft dat keen Denkmal, man se weer stadtbekannt, wieldat männicheen Fier in Bremen — to'n Bispeel Junggesellenafscheden op de Doomtreppen un Kohl-un-Pinkel-Touren — ahn een vun ehr Dreihorgeln nich recht in Gang kamen weer.


Binnenstadt

Fisch-Lucie (1850-1921)


Mudder Cordes hett allens scharp in't Oog.
Bild Quarz/wikimedia commons

Ehrt warrt se mit den Lucie-Flechtmann-Platz in de Neestadt, wo se ok wahnt hett,
man ehren Verkööpsstand harr se oppen Markt direktemang an de Böörs.
Vun twee Keerls harr se 17 Kinner. Arme Lüüd kregen bi ehr faken wat ümsünst, man wenn se in Brass weer, hett se ok woll mal mit'n Fisch smeten.
Se schall de eerste Fru ween hebben, de en Footballvereen grünnt un finanzeert hett — 1907 den FC Stern in de Neestadt.

As düchtige Koopmannsche schipper se nachtens mit ehr egen Boot na de Fischerslüüd hen, üm so den besten frischen Fisch to kriegen. Männichmal hett se allens köfft, ehr Kunkurrenten kregen denn nix nich mehr af.
De Flechtmann GmbH Fischhandlung geev dat in Bremen bet 1988.

Mudder Cordes (1815-1905)

Mit ehren Mann, en Zigarrensortierer, harr se fief Kinner. As ehr Mann doot bleev, mutt se swaren Hartens veer in't Wesenhuus geven.
Mit en Wagen hett se Grööntüüch in de Neestadt verköfft. Den Wagen trock se toeerst sülven, denn kreeg se en Hund dorför un later en Esel, de ehr 30 Johr lang to Deensten weer.

För ehr Denkmal in de Knochenhauerstraße, nich wiet af vun dat Koppel Swien, hett en Enkel sorgt.


Meike Balzer-Fraun, Jan./Feb. 2026/Juni/Juli 26


22.11.2026

 


na baven