vun Behrend Böckmann

Dei Adventskalenner wür ierst in't 19. Johrhunnert Brukdaum vonne Lutheraner. Sei wullen so dei Tiet von'n iersten Julmånd bet Hillig Åbend verkörten un mit väl Freud up dei Ankunft von't Jesuskind täuwen. Tauierst geef dat 24 Biller an 'n Wand, un jeden Dach wür ein Bild afnåhmen. Annerswo geef dat Strichkalenner, un von dei 24 mit Kried an 'n Wand målten Strichen wür jeden Dach einer wedder afwischt. Noch annerswo wür von 24 Strohhalmen jeden Dach einer in'n Krüff för't Kind lecht. Kort nå 1900 keemen dei Adventskalenner ut Papp un Popier för Kinner ut' n Druckerie.

Taun Bispill hett dei Verleger Gerhard Lang in München einen Bågen mit 24 Biller taun Utschnieden un einen tweiten Bågen mit 24 Feller taun Upkläwen för dat Bild "Im Landes des Christkinds" druckt. Lang hett ok as Ierster 'n Adventskalenner taun Füllen mit Schokelor as "Christkindleinshaus" rutbröcht. Inne twinniger Johren keem dei Adventskalenner för all Kinner mit Finster un Dören taun Upmåken in Mod — un achter jede Dör orrer jedet Finster keem 'n Wihnachtsbild taun Vörschien.

Inne Kriegs- un Nåkriegstiet vör un nå 1945 wier dat Popier knapp, un so üm 1950 geef dat denn wedder œwerall druckte Adventskalenner. 1958 geef dat denn taun iersten Mål 'n Adventskalenner, in den achter Dören un Finster nich Biller, sonnern Schokelor verstäken wier. Dei Kalenner mit Schokelor achter dei Luken warden ümmer grötter un ümmer schworer. Œwer wenn dei Öllern dor nich mitmåken willen, kœnen's sülben einen Adventskalenner ut Schachteln von Rietstäken orrer lütte Jutesäck basteln un disse mit lütte Såken füllen. För Kinner af fief Johr gifft dat denn Puzzle-Adventskalenner för 25 € — mit 200 Deile verdeilt up 24 Dören. För 20€ gifft dat Kalenner, wo jeden Dach 'n anner Billerbauk achter't Finster wimmelt.

Un denn disse välen Leifsteil*-Adventskalenner! Wat dor nich allens up'n Markt kümmt: Adventskalenner mit 24 verschieden Oorten von Krut un Päper för 65,80 € — hentau kåmen noch 3,00 € för den Versand; orrer 'n Adventskalenner "Öl & Essig" för 50 €, dei jeden Dach bet Wihnachten hen dat Äten taun Genuss måkt. För 40 € gifft dat 'n Bio-Saatgaut-Kalenner mit 24 lütte Tüten Bio-Saatgaut; anner hollen dat mit Solt ut Hawai orrer Bolivien för 40€. Äbenso düer sünd Kaffe-, Tee- un Müslikalenner. Vör den dubbelten Pries gifft dat Kalenner mit lütte Weckglös mit fruchtige Delikatessen. Veganer kœnen sik för 48 € sülben utsäuken, wat's an Bio-Manneln, Körbsen- un Sojaschokelor, Bio-Gnabber, Bio-Soja-Snacks un annern Kråm in 24 lütte vegane Büdel verstäken; un "Superfood-Lover" kœnen 24 gesunne Bio-Produkten in'n Superfood-Adventskalenner för 50€ finnen.

Dat gifft Adventskalenner för Mannslüd mit wat achter dei Dören taun Plägen von Lief un Seel, taun Bispill Rasierwåder, Dusch- un Horgel un wat den Kierl gaut rüken un utseihn lött. Flachmann mit Schluckindeilung för 23 lütte un einen groten an'n 24. Bierdosenkalenner mit 24 Dosen Bier achter 24 Dören för 50,00 €. Œwer ok för Frugenslüd gifft dat Kalenner för't Schönsien, taun Bispill den Douglas-Adventskalenner twüschen 50 un 200 € för "Beauty-Queens". Sogor för den Spaaß inne Puuch gifft dat mit Batterien un Bedeinvörschriften allerlei Spältüch in erotische Adventskalenner twüschen 60 un 230 €. Un wecker nu noch nich weit, weckern Adventskalenner hei sik wünschen süll, dei kann denn noch den 875 m² weltgröttsten Adventskalenner inne Böttchergass tau Leipzig in Ogenschien nähmen.

*Lifestyle